學余麗珍忍辱做人

議事堂，炮又響，公務範籌，祠堂「重災區」，當然炮聲隆。

唇槍舌戰間，竟有高人，高叫大司長下台，這一回，非同凡響，大司長，習慣溫文，當然溫和恭儉讓，低語和應，若然有錯，則負責當場咁話。

阿茂隔住公仔箱，看得此情況，感動到幾乎淚眼兩行。唔係阿茂鍾意喊，而係替大司長委屈至感傷。皆因我地親愛嘅大司長，功夫唔似「低庄」。

又睇吓大司長班「靚」，除咗個靚女局長同有巢氏外，真係冇幾多個秤得上。

好似個大轎王，做嘢時常好荒唐，管私家轎唔掂，公共轎精挑細選，簡咗個番鬼佬出嚟，重意為係猛龍過江，點知開檔冇耐，就搞出人命禍事連場，兩年多啲，更突然收檔，剩番篤蘇州嘢，但仍有人保駕護航。

點解又會咁嘅，口水佬話，雖然轎王正事無成，但官場之道，玩得甚精，佢係祠堂之中，出名嘅「送紙觀音」，擅長向「大老細」送「紙」云 ，究竟嗰啲係乜嘢紙？聽講話係「花花碌碌」嗰啲，除此之外，據傳話背脊厚，所以企得咁「硬」淨！

如果空穴來「風」係真？大司長點敢「郁」佢，所以唯有「委屈」啲盡管被人「柴台」，亦要默首做人，阿茂贈佢一解「屈」之法，就係如果半夜都嬲到瞓唔著，就要起身，睇吓粵語殘片，學吓余麗珍，點樣忍辱做人。 ‧阿茂‧