考驗半唐番

管「轎」大局長，據說自告辭，成為近月來，「掉職」之高官，無獨且有「偶」，「轉飯鑊」老爺，同屬於一「司」、司長這一回，真個「頭大」矣！

吾知係咪真嘅風水「有問題」，工務範疇高官，近日連環「轉飯鑊」，「理由」當然多多，吾係「個人理由」，就係「健康」有問題，但不管什麼理由，都有一個共同處，就是係佢地管理下之部門，都係問題多多，百病叢生，搞到連管理既老爺都「病」埋！但係佢哋嘅「病」，又「病」得好出奇，「病」到唔使去醫院，只係轉吓飯鑊，唔使日日被人「篤」，尤其係成日口多多嘅時聞仔！

呢班轉飯鑊嘅官老爺，仲有一個共同點，就係同屬一個堂口 ，都係新上場嘅半唐番大老爺嘅部下，佢哋坐係原來衙門多年，印印腳或做到鞠躬盡瘁，但業績都不堪一提，雖然都洗咗天文數字嘅銀両，效果都一塌胡塗，成工俾D蟻民鬧到如似隻「狗」咁款，真係睇見都「戥」佢地難過，好嘞，今日終於「吉人天相」，大步「檻」過，逃出「險」境，雖然留低「篤」蘇州嘢，拍拍「鑼友」，「唔關我事」，「過咗海就神仙囉」！

有人辭官歸故里，面對住大盤難攤子，最「陰功」者，就係匆忙趕科場嘅半唐番大老爺，出使番邦多年，唔清楚唐山搞到翻雲覆雨，無啦啦俾金牌急召返嚟，重升埋「膊頭」，本意為「時來運到」，誰知接到嘅係燙手山芋，搞到「頭都大」，真係焉知是禍或是福？

不過，中國人古語有云，「天將降大任于斯人也！必先熬其筋骨，苦其心智」！是危或機，咁就考驗半唐番大老爺嘅智慧嘞！

但係，阿茂贈半唐番大老爺一句，以史可鑑，祠堂前任嘅大司長，上任之初，又係見到一班「病」夫，即行大刀闊斧，去瘀新生，終於創出一番皆績，唔信，睇下祠堂歷史書仔啦！

‧阿茂‧