蘇州屎要現司長孭鑊真陰功

真唔知係咪「風水」太差，工部衙門近年頭頭遇著「黑」，錯漏百出，是非滿城，搞到前任土地公老爺臨落台之前，竟叫人「打佢幾巴」而「謝罪」！今回議事堂問答遊戲，連大司長老爺都出嚟公開道歉，失晒威。

「陰公」既係，大司長手上接到咁多單「蘇州嘢」，都唔係佢做成，但依家就要佢孭鑊！你話幾咁冤枉吖，簡直係委屈過芳艷芬，痛苦個余麗珍者也！

係工部衙門咁多單「大劑嘢」之中，都有一個共同特點，就係做極都起唔到貨，又嘥咗好多銀両，「大出血」不打緊，最大鑊就係唔知個「無底洞」幾時填得滿，簡直好似係蓮花地嘅「黑洞」。

咁多單「蘇州嘢」之中，細心睇吓，又有一個共同特點，雖然啲員外，交唔到貨，又豆腐渣碎料，更加狂吸銀両，差到貼地咁滯，但係啲官府老爺同員外講數，啲員外唔單止唔知衰，仲振振有詞咁惡翻轉頭，幾乎好似「洗銅錢夾大聲」，勢凶夾狼，仲好似要騎住老爺黎打咁惡死，搞到大細老爺，既驚恐又憤怒，大受委屈，怒氣難消。

長期係咁受折磨，先後有多位老爺又氣又怒，心力交粹，搞到病體纏身，好似「五癆七傷」咁款，寧願辭官歸故里重好。所以，工部衙門近來有官冇人做更加唔肯做，十個茶壼六個蓋，衙堂每空空如也，好似「沙士」嗰陣咁嘅款！

口痕友會問，點解蓮花地咁怪？祠堂啲銀両畀人倒水咁倒，予取予携，攞左銀両仲起唔倒貨？還聲大夾惡，唔通班員外「奉旨行凶」，點解班大、小老爺又咁怕佢哋嘅？唔通啲員外背脊夠「硬」，又邊個撐住班員外？唔通係「太上老君」？呢個問題，全世界真係可能只有蓮花地先會發生，值得大家捋鬆諗諗嘞！

‧阿茂‧