創造守法條件

昨日開始，管轎門，又搞新玩意，裝晒天眼，喺條街道，影啲亂停轎嘅轎伕，如果咁啱俾佢影靚仔相，馬上送上「牛肉干」。 對於呢項新猶，阿茂舉腳讚成兼點頭。因為呢種做法，可以嚇吓啲轎伕，停轎唔好貪「就手」，因為近年，蓮花地啲轎伕，好多過份，經常停轎喺人門口，公眾轎位，更加成日俾人停轎，阻路唔肯走，搞到啲父老，上落公眾轎，左穿右插，險象橫生，冷汗猛流。 不過，想深一層，點解近年，蓮花地啲轎伕，亂咁停轎，阻礙交通，搞到亂籠，皆因轎位奇缺，官家又束手。解決問題，需要兩手，一手抓嚴，多設「架生」，廣設「天眼」，令啲轎伕，唔敢亂停轎。治本之道，增設轎位，俾啲轎伕，容易停轎，遵章守法。唔好犯規。 官家管轎，道理好簡單，好似老竇教仔咁。一方面訂好規矩，叫仔遵守，另一方面，又要創立條件，方便個仔守規矩，既要嚴教，又要錫吓佢，咁嗰仔自然聽話，就會達到「父嚴子孝」嘅理想境界。 阿茂咁講，當然喺好理想，甚至可能係發夢，因為睇吓現實，嗰「老竇」成日訂啲規矩出嚟，要罰嗰「仔」，但係客觀條件，又唔方便嗰「仔」，嗰「仔」想守規矩，周圍望，成條街，都冇位，咁真係嚴父「煎」「孝子」，「老竇」不公，叫嗰「仔」點孝順？ 所以，講到尾，管轎門啲老爺，既然要啲轎伕唔好亂停轎，唔單止要罰，最重要就喺啲街道，增加多啲臨時停轎位，等啲轎伕有法可依，亦有位可停，咁先至喺執法有理，守法者歡喜！                                               ‧阿  茂‧