解師奶憂‧阿茂有計

阿茂去買餸，聽到街市嘈，啲師奶雞啄唔斷，拗到面赤耳紅，一時又講到唇青面燶，講何話題？當前熱議，輸入國產女傭！「師奶抱怨，照顧細路，加埋老公」，早洗晚炒，做老腰酸骨痛，纖纖玉指，手指頭都紅，由朝忙到晚，都冇乜時間，扮靚輕鬆。想搵幫手，外籍女傭，語言不通，煮餸唔好食，重要高人工！ 如今祖國，對澳放話，可以考慮，輸入國產女傭。本來同文同種，又啱民風，若人工唔貴，可以請用，但想深一層，又唸唔通。皆因內地俏嬌娃，個腦同外地唔同，好識風情賣弄，又慣權鬥爭風，一唔留神，好易冇咗個老公，好似成龍播下「龍種」，開枝散業，更加嚴重，唔單止「家變」，分分鐘，大婆可能重被踢出「宮」！ 聽到師奶「心聲」，阿茂晃然大悟，唔怪之得，蓮花祠堂，拖咗咁多年，都識議而不決，一事無成。拖到如今，忍到朝建，都要主動，大開金口，催速落鎚，原來箇中，用心良苦，為眾師奶，預察災禍！甚有遠見，真個的是，「想市民所想，急市民所急矣」。端的是愛民父母官，為蓮花地家庭和睦，人口增長，貢獻太重矣！ 不過，阿茂擔天望地，想穿個頭，又想出個絕世好「橋」，一舉數得，公諸賢達，呢條好「橋」，就係專利輸入，順得馬姐。不得別鄉，何解？因為順德人，人種如其名，多數人和和順順，更甚有道德，至於馬姐，更名揚古今，唔單止煮得一手好餸，連醃尖阿斗官，都食到咀酣耳順，順德馬姐，更富令人放心優良傳統，就係梳起唔嫁，只係博命儲錢，老來還鄉，買番間姑婆屋，三數姊妹，養蠶、繡花、安享晚年，唔似時下，D俏嬌娃，專揀濶佬，瞓身去嫁。 所以阿茂話，蓮花老爺，大開綠燈，專照順德馬姐，既可幫師奶，減輕吓家務，又唔怕人口，將來愈益老，因為馬姐，完成任務，回鄉養老，重吾唔會攞咁多勞保，人材錢財，兩者皆好。 若果師奶，重唔放心，生怕老公，偷雞開葷，可加規定，輸入馬姐，必須貌醜，最低年紀，逾愈不惑，仍不放心，可至「古稀！」 ‧阿茂‧