經屋平定貴 爭拗無寧日

永寧經屋，唔知係咪改錯嗰名。原意「永寧」，但係因為價錢問題，搞到永「無」寧「日」。蓮花地各路高人，出嘈交，仲扭盡六壬，甚至「偷天換日」，瀰漫「真」「假」莫辨，睇到唔少人，一頭霧水，重茂過阿茂。 阿茂老而不，一把年紀仲學人做細路仔「法官」，將各路高人偉論擺出，畀人評論吓，D蓮花經屋，賣價究竟係「平」定「貴」，唔知係咪開口昅著脷，俾啲「網中人」鬧係「無知」，鬧阿茂唔緊要，因為做人低B就應該畀人鬧，最慘就係連累埋掛單寺門，攪到方丈好委屈，有完無路訴，阿茂今回真係「神憎鬼厭嘞」! 阿茂點解咁乞人憎?因為都擺出官家同炒字幫觀點，話啲經屋賣價好平，同時又引述實際起樓泥水佬講法，同蟻民心聲，話D經屋賣價貴!最大錯特錯更加係唔覺意露咗「天機」，爆咗泥水佬講「機密」，經屋建築成本「唔使」廿萬!於是，引起「網中高人」萬箭穿心，鬧係無知，誤導。 阿茂感激高人指正之餘，摸摸個頭，擦乾淨對眼，睇清、想透「高人」指正，但係又唔明，「高人」點解羅列咗近今紮鐵工人由千一蚊至千六蛟高工資等一系列昂貴開支，嚟証明經屋成本唔止廿萬之後，佢又講出，五、六年前，呢D人工係平咗一半。阿茂查吓經屋初建年期，咁樣就系平人工果陣係。阿茂真唔明，吳解「網中高人」用近年貴人工資水平來掩蓋，當年教平唧建築成本？經屋係多年前建成為何用近年貴開支來推算成本? 咁得咁「橋」，上個禮拜，有蟻民打電話上「大聲公」嗰口水花節目，話佢三年前賣氹仔市中心達地經屋時，三房一廳八百幾呎，買價只係十八萬，大老爺相信唔會咁蠢，以蝕本價賣屋畀蟻民，街坊師奶更話，當年買氹仔經屋時候，兩房一廳，賣十六萬咋，仲冇人吼添，。太子興仲插咀，舊年佢係英國「紅魔鬼」曼聯祖家曼城，買咗一幢三層高別墅，六房兩廳，建築面積成千八佰呎，重有圍至間屋二千幾呎唧走馬花園，只係港紙二百五十幾萬、重平過澳門大單位經屋，英國喺世界出名人工同物價貴國家，唔通蓮花地建築成本重貴過佢? 最離奇係，「有「網中人」貼紙指出，今年工務司長發出批示，要發展商須將百幾個經屋單位，賣番俾政府，平價單位只係十七萬幾，貴價大單位，亦只係廿零萬。咁同泥水佬話經屋既建築成本價，唔使廿萬。有冇道理?還係官家夠惡?而圓外「好蠢」? 阿茂話，各路高人，其實唔使拗得咁交關，最好係官家公佈，經屋成本，咁售價平定貴?咪一目了然囉! ‧阿茂‧