應引入電動巴士

蓮花地，辦車展，除咗名車，大巴小車，亦可用電，唔止環保，更可慳錢。阿茂睇電車，激動似「觸電」，皆因睇市面，到處漫污煙，肺癌死者多，躍居第一線，蓮花地蟻民，條命唔值錢，如何減污染，衙門嘅老爺，「偉論」就連篇，實際嘅行動，卻又唔多見。 車展師傅話，用電嘅巴士，唔只冇噪音，更加唔噴煙，安靜夾乾淨，維修更省錢，每年廿幾萬，易省回本錢。用來做公交，行走窄路面，附近嘅居民，唔怕受污染，小車行市面，環保又方便，只要有電源，隨時可充電。 阿茂忽想起，鄰埠嘅香港，最近出新例，若買環保車，官家補貼錢，主要嘅目的，鼓勵車用電，長遠嘅效果，減廢氣、滅噪音，除污夾保健。這一好政策，官家出少錢，環境見青天，真係「想為民所想」「急為民所急」。 反觀蓮花地，大老爺把咀，偉論常連篇。乜嘢鼓勵綠色出行，減低大氣污染……。如何達到目標？有何具體行動，有否鼓勵政策，阿茂擔天望地，亦睇唔見。 睇報紙話，蓮花地，肺癌死亡率已升到死因中第一線。究其主因，廢氣、噪音，為主殺手。全城廿多萬車，時刻噴污染，令到蓮花地，全球污氣城，已躍居亞軍。 污染車之中，以公車為主，公車加官車，數量已不少，行車頻率高，若皆改電車，污染即大減。官車嘅「老勢」，當然係官家，如今公交車，亦受官接濟，當應受指揮。因何不改善，為民多諗計？是否講口響，實幹不去想？ 蟻民困污氣，肺癌接續死，若減民「升仙」，官行動速展，推出好政策，鼓勵車用電！ ‧阿茂‧