急急如律令

急急如律令

呢一排，蓮花地，時聞界，好奇怪，時聞大老爺，好似轉咗性咁，同佢大多數啲同僚相反，突然的起心肝，好勤力，搏命打鑼，到處去搵啲父老、師奶問計，佢話要起番個祭壇作法，做好功德，唔好嘥咗啲陳年皇榜咁話。 更奇怪既係，本來大老爺一番苦心，造福萬民，應該全村慶允，誰知只係自己友舉腳叫好，唔少時聞仔，就眼尾都唔想睇。 點解咁怪相？講起嚟就一匹布咁長，話說係『冇雷公』咁遠既『馬介休』年代，阿牛叔成日激心激肺，皆因個陣時啲時聞仔，成日唔聽使，更加周時係度吠，牛叔嬲起上嚟，想整番個籠仔，罩住在時聞仔，想唔俾佢亂吠，點知幾經辛苦，上栓下夾，左拼右插，到整出啲皇榜時，又有班時聞仔係度『頂頸』。終於皇榜勉強掛出，又嚟唔切做祭壇，結果有榜無壇，想罩住時聞仔個口，自然『頸番』。 之不過，蓮花啲班時聞仔，雖然冇王管，但係佢哋都好乖仔，咁耐日子，都冇行差踏錯，不嬲都好識大體。新祠堂開檔，大賣『河蟹』，呢一味係馬交名菜，時聞仔就更加捧場，向安無事。 但係又唔知點解？近排蓮花地啲老爺，突然間自尊心爆棚，成日驚死人對佢地唔尊重，突然間想整條皇榜出嚟，話如果蟻民對佢地唔尊重，老爺就告啲蟻民褲穿窿咁話，惡得咁交心，時聞仔當然睇唔過眼，群起發難，大老爺見勢色唔對，自知理虧，皇榜未出街就落雨收柴。 呢一回，老爺又話重提設祭壇，舞榜揚幡，不過，手法就好『得體』。話同父老傾計，仲不惜工本，洗咗唔少銀兩，係番邦請咗班大學士，仲話用天下最摩登既法子，呢聽吓父老啲心韋，務令廣納『心意』，先至做『法事』。大老爺重鄭重其實，做嘢仲公正個包公，並無乜鬼主意咁話。 點知，時聞仔觸鬚精靈，撩一撩，就爆出D『鬼橋』，話大學士啲『傾計』內容，原來有『餡』，一般蟻民，『傾』計之間，易被落藥』，好易認為，啲時聞仔，應受嚴制。乜野『並無傾向』，實屬『妄想』。 正如桂枝既『傾計』大博士話齋，蓮花地啲時聞仔，依家仲係好細，不單唔應管制，更要悉心提攜。俾拒哋自由發揮，等佢地大個咗，先睇吓應唔應該修例。 雖然，話又講回頭，有人話紥咗三吋金蓮，人就規行矩步，自然品高。但喺，時聞仔嘅特點，就係鐵腳，馬眼。既要走得快，又要睇得遠，更要睇得清，咗個口罩，就難為民『出聲』。 講到尾，由於皇榜之出籠個陣，早已有問題，如今再揚榜設壇，時聞仔更加要睇清想楚，雖然有人拍心口派定心丸，急成『好事』，點解咁急？係咪。時聞仔阻頭窒勢，難以『上下其手，又怕出醜』？ 呢一回，真好似祈福婆對住細老哥，一邊『佛口婆心』，另一邊卻步步疑心，俗語話齋，欲速則不達。蓮花祠堂，自從開檔，做事作風，似『慢郎中』，『做得慢慢』，因何這趟，突變『急驚風』，馬家逼婚，最後結果，搞出『梁祝遺憾』。縱使神女有心，亦待襄王想『過癮』。正所謂皇帝都唔急，太監何須急？！ ‧阿茂‧