終於醒悟

未知是「迷途知返」還是「瞓夠醒番」?管轎衙門突然有作為一番，順應民意，將阻路車位設限，拓寬轎道，方便轎車往返。雖然早應實行，拖至如今，略有作為，仍受蟻民「一讚」。 呢個偉大「作為，就係將沙梨頭一帶道邊轎位，日間取消，「攞番」啲路面，俾啲轎車嚟行。轎老爺昨日打鑼，話咁樣做法，目的係減輕塞轎，畀啲轎伕，慳番啲時間。 其實咁做，早應實行，市井坊間，早已大喊，但係老爺，唔知係咪，瞓得太冧，還係做嘢「太慳」，梗係長期不動。等到蟻民反眼。 沙梨頭一例，引伸到城市中間，新橋區一帶，仲有美副將馬路同大炮台之間。路面窄窄，路旁停位縱橫。停轎位佔地，竟然比行轎路面更寬，轎伕擠擁其間，塞到怒髮衝冠。 沙梨頭一例揭示，蓮花地內，路旁轎位，市區之內，尤以舊區，應該盡快清減。清減轎位，僅是治標，治本之道，分兩手行。一方面，轎數設限，另一方面，大增停轎場，盡將路邊轎，全部請入場，還原轎道，任轎暢行，蓮花地轎務，將可改善，轎暢其道，貨暢其流，經濟運轉，自然更生猛。 為政之道，首重實幹，兼聽各方，實踐其政，方為正道。否則，只顧誇誇其談，弄虛作態，只講不做，必然唔會好，無論如何，管轎老爺，雖少動作，略有改善，望好開始，也值一讚! ‧阿茂‧