天災顯人禍

日昨一場大雨，「淋」出蓮花祠堂嘅百孔千瘡，亦暴露出各大衙門之「痼疾」病況，衙門長期之無能，因大雨而令蟻民瘡疤加鹽外，使蓮花人體會更深的是，人禍之害，大於天災。

大雨在傍晚五時許開始，不到半小時，已落至「冧山」咁款，「睇天」衙門，卻延至一個多小時後方「打攞稟神」。早已被淋到「隻狗」咁款嘅蟻民，聽到「雷雨警告」，當然聽到火燒心。當然，呢次唔係「睇天」衙門嘅「處女作」，過去佢哋亦都經常「好戲」連場。係蟻民「慶」到辣雞咁款嗰陣，整啲「搞笑」節目，可以「降火」者！將功贖罪也？！

「魯班」衙門早兩年曾「大搞作」，使咗唔少銀兩，係「高士德」搞咗條「地下情」。要蟻民忍受咗近兩年後，重安慰番一聲，今後唔怕「水浸街」啦！點知言猶在耳，高士德又「水浸長城」，呢個故仔教訓蟻民，蓮花官人，好似花花公子咁，最叻嘅就係使錢兼呃人。

講到花花公子，近月係氹仔重「駕勢」，整緊條「鑽地龍」，唔單止成個埠沙塵滾滾，重搞到沙坭遍地，塞咗唔少坑渠，搞至今次大雨下，地龍一帶成為水浸「新災區」。驟眼一看，半個氹仔好似威尼斯水城咁款，名副其實咁變成一個大水氹。官也街啲商民損失慘重，當然大罵「官人」。

「官老爺」之間又耍出首本戲，除咗缷膊重要互「篤」背脊，又話「金巴拿」衙門疏渠不力，「金巴拿」衙門今回「粒聲唔出」，因為舊年佢地先使咗唔少銀兩，整咗個泵房，重牙擦擦咁猛「晒」泵力非凡。點知今日又再「運作不力」。重敢「浦頭」？

                                 ‧阿茂‧