「自由人」加入搶奪 執紙皮婆婆叫慘

「嚡，依家澳門街真係搵食艱難！連執紙皮都有人同你搶！」筆者：「邊個同你搶呀？」，「咪自由行啲人囉！」 口吐怨言的不是豪華賭場內的斯文青壯「莊荷」，而是年過七旬瘦骨嶙峋的老婆婆。呻氣的地點是繁華鬧市的「三盞燈」生果街旁。 老婆婆邊努力紮好大叠厚重紙皮，邊使勁地把紙皮拉到她的手拉車上，筆者見狀，上前幫她一把，老婆婆既感激既冤屈地吐出怨言。 婆婆稱，由於並無親人，又無入息，社會福利金又不足，為了幫補生活，有空便出來街上執紙皮，三盞燈、板樟堂一帶的商店區，商店丟棄的紙皮及雜物比較多，便是她尋生活之所在。每日清晨或深夜商店丟棄雜物時間，便是她「開工之時」。 婆婆稱，雖然澳門目前重有過百人靠執紙皮為生，由於每日商店丟出的紙皮、雜物尚多，兩、三年前，她每日都能撿到幾百斤紙皮及雜物，可換得一、兩百元。幫補生計，但近一年，多了一些「自由行」內地人加入戰團，「佢哋都年青力壯，手腳又快，好多時啲紙皮一丟出嚟，就俾佢地手快執去，所以近一年執紙皮都搵唔到幾多，平均都唔夠一百蚊一日！」老婆婆憤慨的說：「有時遇到啲衰嘅自由行內地人，連我執到縛好啲紙皮都搶去白捱，真係雪上加霜，你話依家澳門搵食艱唔難吖？」。 聽過老婆婆一番苦水，不期然令人茅塞頓開，難怪月入過萬，被視為高薪、優差的賭場「莊荷」，對輸入外勞反對聲音如此大，露出那麼虛脅之恐懼感。在繁華盛世之外表下，澳門社會低層，連最令人忽視之行業，年邁體虛之老人家，亦要經常「龍爭虎鬥」，亦令人希望「動輒浪費以億元計的老爺們，收歛一下，莫更「錢多人傻」，稍稍想想「老婆婆」！                                                                           ‧楊善行‧