執到書變成借書不還 老翁幾乎搞到欠巨債

雖然閱讀係良好習慣之一，但係英國就有個老人家因為執到舊書幾乎欠下一身巨債，好在李斯特城政府肯大發慈悲先至冇事，如果唔係分分鐘會成為因為執到舊書搞到要申請破產「騎呢」列子。 現年六十四歲基夫道芬（KEITH DOLPHIN）已經退休，而佢一次幫人執屋時候就執幾本舊書當係報酬，其中一本叫做「MASTER OF MEN」舊書雖然並非一流世界名著，但係依然吸引到道芬注視，事關呢本舊書背面有張貼紙印住「李斯特城圖書館」，另外仲印明要「一九三四年五月二十八日」還書，換言之呢本書借出之後足足有成七十九年都未還！ 之不過道芬執到呢本舊書可以話係異常好彩，事關當地政府話執正做話，道芬可能要交高達一‧一萬英磅（約十四‧四萬港元）罰款，好在由於真正借書人並非道芬，同時借書人亦都不知所終，當地政府經考慮之後決定唔再追道芬任何罰款，如果唔係道芬隨時會因為手多多而欠一身巨債。 好可惜並非人人都可以逃過罰款，原來英國上年亦都發生過借書唔還類似事件，教授約翰科士打（JOHN FOSTER）四十七年之後先肯還書，總共交成八千五百七十七英磅（約十‧七萬港元）罰款！