破壞秩序‧為害地方 廢青要加強愛國教育

近呢一排，係蓮花地嗰噓度，嘈得好交關，爭抝嘅話題，唔係師奶好關心嘅柴米油鹽，又吾係權貴哥兒好有興趣嘅聲色犬馬，而係阿爺好擔心嘅愛國同道德教育！教育對象嘅後生、細路，則唔係好緊張，仲好似「事不關己」咁款！

講到愛國同德育問題。第一個根本無需討論，國恩如父母，肯定要愛！舉世皆然！點解又有啲人咁多聲氣，諸多反對，甚至搞到呼朋引類，走去大衙門遞信咁大陣仗？無他嗰啲人可能自細係殖民地長大，從少冇乜國家觀念，依家要撥亂反正，就神經衰弱，好似觸到痛處，鬼殺咁嘈，想真啲，嗰啲人腦袋真可能缺少咗一啲嘢，所以表現得咁幼稚同可憐，如果佢地嘅眼光能睇遠啲，睇吓附近東南亞啲小國，就柬埔寨咁細為例，每朝國門開關，都要奏國歌，上下人等，不論權力高低，一律肅然致敬；佛國泰國，更加認真去戲院睇戲，開映前，播出泰皇尊像，高奏國歌，戲院內全體人等，皆同肅立致敬，睇過咁嘅場面，就知道一個正常國家國民嘅愛國情操係點！一向強調個人自由嘅花旗美國，打場籃球，都要國旗高懸，高唱國歌，先至係正常。對比蓮花地嘈隆隆反對愛國教育班「嘩鬼」，你話佢地幾咁幼稚夾失禮？！

講到道德教育，更加要喺蓮花地大力推行。因為近十多、廿年來，蓮花地經濟日好，物質生活不斷改善，不少家庭，多犯左中國人嘅壞習慣，嬌縱下一代，正所為俗語所講嘅「人無三代好。縱出二世祖！」

近年，蓮花地唔少家庭嘅年青一代，多被縱成「小皇帝」，唯我獨尊，刁蠻跋扈，自私自私，貪權逐利，漠視公德，知識貧乏，眼光短淺，卻多自命不凡，屢屢破壞社會秩序，視法律如無物，好害地方，有損地方聲譽，這些憤青或「廢青」，不加強教育，成嗎！？

‧揚正氣‧