不做好公交 控車白搞

【本報訊】新屆政府表明要以經濟手段控車，有市民批評做法本末倒置、倒果為因，因為若做不好公交，不管要如何控車、增加擁車成本，「冇人會放棄自己架車，要揸車嘅人都係要繼續揸」。

澳廣視澳門論壇昨討論控車措施，包括當局最新宣布要在皇朝、南灣和氹仔試行八十個十分鐘一元、上限一小時咪錶位。

氹仔社區發展促進會理事長梁鴻細、議員鄭安庭，以及交通諮詢會委員凌世豪皆不贊成。他們認為在車位緊張情況下再推有關措施，只會車位更見緊張，也加重道路壓力，又欠相應配套應對措施，變相擾民、不負責任。

有發言市民認為有關舉措可增加車位流轉性，但在現時咪錶位執法不嚴下，可謂基本沒意思，效果也是空談，因違規成本低，「（超時）不是即抄，抄咗也是五十蚊，有時唔係即鎖（車），泊成日都啱數，鎖咗又唔係即刻吊」

環保電動摩托車商會會長李仲森表示，執法人員不足，為何不仿傚港台做法，由咪錶公司人員去做。他相信交局此舉是善意的，故試行未嘗不可，「唔試就冇改進，不如睇下試一試」。

有市民則不認同，「呢啲政策嚟假，有得試下先咩？」一如取消停車場月票一樣，當初一話取消，全澳車位封盤的封盤、升價的升價，惟最後又話不取消，批評政府這種「試下先」的思維不負責任。

他不諱言，這一連串經濟手段無助控車，「你講加稅，我畀你加一倍，八百五十加至一千五百蚊，有冇人會放棄自己架車？無！要揸嘅人都係要繼續揸，係解決唔到問題！」

他續說：「點解政府唔係做好個公交先呢？依家完全係叫本末倒置、倒果為因，政府冇諗過係自己做唔好公交，所以啲人先揸車，而係話你哋一個月出九百部車要控下你哋，完全係反轉思維！」

認同加車稅、增養車成本等的梁鴻細則謂，經濟手段控車會衍生不公平，富者與貧者都同付出空氣污染和交通擠塞的成本，但只有錢人才得到好處，可買車、擁車、用車，變成貧富差別待遇，故政府要平衡好，不要造成另一個社會矛盾。