阿茂激到氣咳

阿茂好委屈，激到氣都咳!想擊鼓鳴冤，又想去投河，皆因睇見，蓮花祠堂，借錢俾人，既冇得還，為民請命，被告一餐，怨哉枉也，賠了夫人又折兵，頭頭碰黑確慘情，蓮花祠堂，點解咁慘?高津厚祿，高官待臣，點樣護駕?衛政護民!?

蓮花祠堂，開檔以來，連場受屈，加上損失，真係慘過芳艷芬，屈過余麗珍，話說早年，有間大鳥行棧，專門幫人，飛鴿傳書，運人又送貨，威到南半球，點知個老勢，雖家財億萬，一幫圓外，風頭頂盛，威過一時，可惜來頭雖猛，做嘢「則流」過阿茂，大鳥開張無幾耐，就話餂皮，越餂越深，圓外張口，四處呼救。

嗰時祠堂，菩薩心腸，即刻解囊，過水億兩，圓外雖然，家財萬貫，面對銀兩，想都唔想，即刮入囊，一借多年，應咗一句，財到光棍手，一去冇回頭，蓮花祠堂，借出公帑，泥牛入水，化為烏有。連帶行棧，突告破產。父老嘩然，即誕名句，非凡非凡，借去巨資，有借冇還，認真非凡。

權重如祠堂，被唱到面黃，被騙不打緊，接踵加「一棍」，話說前朝，馬介休時代，老西「劈炮」前，留下蘇州嘢，無端批「專利」，有線公仔箱，點知嗰陣時，「線仔」滿天飛，亂籠無人理，「專利」嗰老勢，鬧極官唔理，擊鼓去鳴冤，告到官「飛起」，點知官老爺，一於好少理，生包公火滾，罰祠堂「孭飛」，一罰兩億皮，坊間眾蟻民，肉痛又激氣。仍然悠閒者，眾官之表現，似擦痕搔表皮!

蓮花官俸祿，豐厚衣食足，豐腴飽食後，表現似木獨，成敗不痛癢，只俸祿長享。從來少問責，更懼圓外嚇。遇事莫敢哼，公帑任侵吞。年來官司多，破財兼惹禍。因何咁窩囊，唯一之解釋，錢多人又傻，如今財儲減，遇屈只叫「慳」!

‧阿茂‧