女強人發強音

阿茂冇講錯，蓮花地就係蓮花地，經常爆「離奇」，最近又爆一「奇」事，全城上下，各方鄰里，紛紛伸手，玉成好事，偏偏主事官家，「闊佬懶理」，真俾「佢」氣死！呢單嘢，係乜東東？之唔係關閘地下停車場「篤蘇州屎」囉！話說「天鴿」風災，經常受損嘅關閘停車場，又「慣性」「受傷」，成個「癱瘓」，搞到又烏燈黑火，烏煙障氣。本來呢「篤蘇州屎」，係呢十幾年來，成日唔掂，蟻民已經「熟晒品」，整完又整，嘥咗幾千萬，依然唔掂，對呢「篤」嘢幾乎冇晒信心。

不過，過去「篤」嘢經唔掂，俾D「老爺」 洗咗大筆銀両後，通常一兩個禮拜或一頭半月，又可以「復活」，但係今次，班老爺可能覺得語不驚人死不休，（抑或另有內情），摸完個算盤底先至話，呢「劑」好杰，除咗要洗大堆銀両外，仲要嘥兩年光陰，先能夠令地下停車場恢復功能，但唔一定恢復原氣，只係「郁」吓咁話，可能還比以前差好多添？講來語帶恐嚇，還慌嚇你唔「死」咁款。

怪論一出，全城嘩然，地下停車場，暫廢「武功」，已經將幾十條線嘅公共巴士趕到附近地面，搞到北區一帶，「賓墟」咁亂，每日幾十萬乘客，為咗搵巴士，扶老攜幼，帶住大包細包，走難咁走，苦不堪言，如今老爺仲威嚇話要「捱」兩年，真唔想捱死都幾難矣！

不過，澳門人，唔係個個都好似D官咁「黑心」，保安一哥即刻話，如果冇地停車，「差房」可以搬，另一邊廂，工會阿頭亦慷慨咁話，地下停車場隔離嘅球場，亦可以讓出來用，以濟燃眉之急，亦有司機大佬話，地下停車場一側嘅台山發財巴站，原來就係公交巴站，可以還原！恢復為公交站，全城上下，對關閘地下停車場之「不幸」，均伸出援手，希望盡快解決問題，以減蟻民之苦，及協助澳門經濟。

但，偏偏主其事之老爺，則反應冷淡，還「道理」多多，硬指，關口地面兩側之現有停車場，為發財巴專用，不方便動也！此「道理」令民氣結，不禁要問？官僚施政，目的為民？還是只眼朝「金銀」？不過，日昨傳來石破天驚之聲，連大博企之「女強人」，眼見官老爺腦袋太胡運，亦公開發聲，若有需要，發財巴停泊區，可以讓路，方便蟻民！

這才是「想為民所想」，「急為民所急」！關閘地下停車場搬遷，是不能為也？還是不想為也？道理擺得不是很清楚！

‧阿茂‧