驚世高論

蓮花埠，奇聞怪論經常有，內容，論文屢創「新」，鬧劇高潮「鑊鑊甘」。 話說蓮花寶地，日前海龍王噴大水，「欽天監」班衙差，唔知係咪仲未醒，或嘆緊「奶茶波蘿油」，誤晒「更」先至去「打鑼」告急，搞到班蟻民上班族，扮到隻雀咁美女，靚仔，淋到成隻「落湯雞」同狗咁款。罵到全城媽聲四起。 責無可卸，橫掂喱係衙堂都俾人鬧死，「欽天監」老爺索性走去墟度，向父老「疏呢」，「沙」，現身解話，同時補鑊，希望功夫唔夠，實靠人情搭夠。博父老感情，單多次眼，俾佢又「側側膊」過骨別了。 點知又係應句，「人有幾多斤，自然生出個樣」，「欽天監」大老爺外表似補鑊「高論」，又開口岌著真係高到無倫，連丈八金剛，也摸不著頭腦，，越聽越莫明奇妙。更何況星斗蟻民，全城父老，咋聽「高論」，登時呆，變晒好多蓮花高官咁懵，而且越聽越。好似打懵仔針咁款。 究竟大老爺「高論」點威?佢話，打鑼報天象，「要符合用家需要」，不單單依循國際標準。懵仔成即話，「欽天監」衙門打鑼，唔係睇天報咩，正所為「天行有道，變化有數」，咁多儀器，咁多律例。數據確實，點解吾解夠成為「打鑼」依歸，而要「就」住「客仔」。究竟大老爺所講「客仔」，心目中又係邊位?「打鑼」告急，都唔依實直說，而係「度身訂造」，「就」住「客仔」，唔通趙公子想同阿多情女，係沙灘晒月光，情訂郊野間，天地交泰，明明係十級颶風，天旋地轉，雷轟閃電，「欽天監」也要「就」住「用家需要」，打鑼話「朗月晴天」?如果係咁，就認真用心良苦，真係蟻民父母官矣? 之不過，蓮花管家婆又成日誓神劈願咁話，「想市民所想，急市民所急。」明明係九龍皇向蓮花地噴大水。「欽天監」衙差竟然將「預告」拖到變成事後「哀悼」。管家婆誓願「急」，「急」係邊度?實際結果，就係「欽天監」班老爺「符碌」，令到搶救損失班父老商民，急到汗小多過雨小。 一個以科學數據為決策基礎的衙門，老爺們竟然以「官」人意志為決策依歸。其禍害如何，大家有目共睇，大老爺驚世「高論」，演出之鬧劇，普世之內，只有蓮花地先至有得睇，你話幾威，蓮花地何止繁榮盛世，連大老爺「高論」，也傲視同儕! ·阿茂·