陽光灑遍新填地

話說蓮花地，向來豆腐潤咁細，啲「員外」要「發圍」，都要求求「土地公」保祐，先可以土能生白玉，地可出黃金，所以蓮花地啲「地」，重衿貴過貂皮，好鬼難求。 前一排，「土地公」話，乞得朝廷恩准，俾蓮花地「發育，增肥」，可以「生」多啲寶地，各路員外，欣喜若狂，心想又大可生白玉，出黃金也。 對住呢批生財寶地，太公應該點樣去分？雖然大家都心中有數，但係無論如何，嘅然宜家祠堂做緊嘅係陽光正氣劇，吾論做好做醜，點都要做番套合時「好戲」出嚟，應吓父老街坊，先至有得交差。 故此，「土地公」衙門就響鑼，大、細老倌，粉墨登場，展藝街坊，演過首本之後，加演一幕，問吓觀眾，場戲咁做，有乜高先，重話呢場好戲，全為父老，真係酬謝神恩，亦福蔭黎民咁話，希望聽吓父老高論。 本來，官家呢啲戲，係龍係蛇，結果如何？大家已睇到慣，早心中有數，講吾講嘢，冇也分別，最令人愕然嘅係，細老倌意然特別隆重咁講，今次呢場戲，好想父老參演，為咗避開過去衙門傳統的衰嘢，特別隆重其事，打破「常規」，吾使競爭，專門請咗班威到盡嘅「順風車街高手，重會用好多摩登法子，到處去聽的街坊父老「拈點江山」嘅高見。 由於特點「殺」出呢批「大內高手」，又會用好「摩登」嘅法子嚟聽「順風耳」，對於習慣洗腳吾抹腳嘅「達官貴人」，呢套「戲外戲」，又要洒幾多銀兩？ 令人驚愕嘅係，細老倌竟然話唔講得！因為呢批「高手」，要做幾多嘢，幾多人做，到宜家都唔清楚！？做咗出嚟，先至講錢啦。 真係驚世奇談，官家口口聲聲話要聽父老高見，但係要聽幾多，搵「高手」做幾多嘢，預算多少，臨到開場，都唔講得，（或者「吾清楚」，吾記得，更或吾想講），吾通請人做嘢，可以任人「打死狗講價」？太公銀兩，可以隨意花？咁嘅做法，又係陽光鑼鼓下嘅又一場「陰霾戲」？係咪「陽光」劇下又做多一條「暗水渠」，隨意放水？還是係「土地公」衙門嘅一貫傳統首本「好戲」，睇睇佢地吾多干淨嘅往績，令人心已塞 ，咁就要問吓 蓮花包青天，或者成日誓神劈願講「陽光」嘅蓮花尊者至得嘞！             阿茂