蓮花官吏難治煉獄

前一排，阿茂閒來無事，擺張舊時聞聞紙睇睇，發現一段「喜訊」，既喜且惑？按「訊」索驥，實地一睇，不禁愕然！反覆思考，翻查歷史，細心歸納，猛然發現，蓮花官差，吏「術」「高超」。「出神入化」 此話何解？皆因「喜訊」打鑼咁話，蓮花管「轎」衙門，經過近兩年「努力」，已經將「熱如煉獄」關下「擺轎場」環境，有所改善」。「擺轎場」溫度，已經「有所下降」。 父老都知，關下「擺轎場」兩年前，因為打風，水浸到好似個「豬籠」咁，摩登燈籠同摩登涼風扇都浸到「死晒火」，由時起，關下「擺轎場」就變成地獄咁，既熱辣辣，又濕立立。天熱陣時，重衰到好似「煉獄」咁，慘過關外火焰山，簡直「生人勿近」。臭名遠播。 負責個場衙門，雖然俾父老鬧到無倫，公差反應仍然係「柏金遜」，借晒聾耳陳雙耳，一於當聽唔到，實行啋你都傻，我自安枕無憂，繼續「奶茶菠蘿油」。 後尾，由於俾蟻民鬧得多，「管橋局」衙門於是起「心肝」，運足全勁，終於話要做番，經過漫漫長夜，又拖兩載，「管轎局」終於擺開個檔口，向時聞佬打鑼話「喜訊」，改善「煉獄」溫度。積番多少「陰德」。 咋聽「喜訊」，重意為班公差終於「浪子回頭」，肯做番。阿茂住張「喜訊」，歡天喜地，走去關下停轎場，心想享受「成果」，點知一到轎場，又係依舊「煉獄」咁，場內企唔夠一分鐘，即刻熱到大汗細汗，就算挨身埋去餉「冷」氣出風口，又係「氣弱柔絲，有好似冇，不過，亦聊勝於無。如果話有涼效果，可能最大係心理掛。 走出地下「煉獄」，雖然仍然三十度。總覺較為涼，頭腦一醒，猛然醒悟，「管轎」衙門公差，打鑼咁話，情況「有所改善」，原來最大成就，為象徵性。擾讓兩年，花錢如水，得出「成就」，「象徵意義」，若然阿茂，似大老爺，枕於衙堂，只看報告，這個「成就」，必信無疑，甚而犒賞，加官晉爵，升官發財。天下蟻民，不知就裡，只看「成就」，循例鼓掌，識做衙差，又側側膊，又告「過骨」。兼且「風光」。 可惜阿茂，冥頑不靈，信雙耳，又要信眼，實地一睇，便看出「鬼」，蓮花公差，近年做，怪招頻出，翻查偉績，早幾年前，蓮花寶地，鐵馬泊位，嚴重不足，公差大人，大拍心口，大量供應，一眾蟻民，一頭霧水，「大量供應」？邊處有地？結果，鐵馬泊位，果然多！因為公差，曉變「法術」，將「轎」位，改成「馬」位，「馬」位增多，「轎」位變少，暫時塞住「馬」夫嘴，到「轎」夫嘈時，又變過來，轎夫。一句講哂，好似賣武佬馬騮，每日十個蘋果，朝五晚五，馬騮話唔夠，賣武佬即「順民意」，朝六晚四，到隻馬騮，常開笑口，大讚賣舞佬係好「老竇」。 想到「公屋」，大老爺話要起「萬九」。但係拆舊樓，先起新樓。起哂新時候，可能夠「萬九」，但係減去拆數，仍然係唔夠。 經過多方歸納，細心研究，終於發現，蓮花公差，果然係德政高手，幾手個個都係東洋魔女，做起，常開「鬼影變幻球」，移形換影，若真似假，偷換概念，唔睇真，蟻民好易，變成阿茂。 阿茂