濠江要設旅遊警察

阿茂今回唔係又做餅，而係有益而又有建設性建議，重關係澳門百年大計，同全澳居民安危，呢條絕世好橋，就係催促大老爺盡快開衙門，迅速解決一切遊客喺蓮花地發生問題，唔好好似日前咁「折墮」，自己人俾人打咗，重要武裝護駕送兇手走，献世全球。如果大老爺唔聽呢支笛，全蓮花地「帶街」，可能走晒上嵩山少林寺，果陣時蓮花地重兇險過木人巷嘞！ 此話唔係想嚇死人，因為大家都睇到，日前蓮花地「帶街」，俾人打得咁凄涼，打完人惡爺，重即刻去風流快活，即使俾百幾人圍住，群情汹湧要追究，甚至逍遙衙門同巡部房阿頭，面對面同佢理論，佢重可以滋油淡定同你捉字蚤，砌詞詨辯，激到啲老爺出煙。 當然，近呢十年八載，喺北方確實唔少人突然「發」咗，由地踎變咗大哥，正所謂財大氣粗，當全世界人冇到，橫行霸道，去到邊道，惡到邊道，輕者亂駡人，重者用拳頭嚟講「道」，正所謂，「拳頭才是硬道理」，近呢排，桂枝、馬交、寶島，甚至好好禮貌扶桑東洋，唔少新聞，都係啲北方「貴人」搞事，唔單止打、駡當地人，甚至自己人碰見，喺外地都互毆一番，認真失禮。 呢啲現像，可能係佢地鄉吓傳統，亦可能係一類人獨特作風，因為有啲人，礙於出身，雖然突然「發達」，但唔識立品。 啲「貴人」品德喺點，馬交人無權置喙，因俗語有話「面係人哋俾，係自己丟」，宜家蓮花地做生意龍頭，係俾人嚟玩，唔理佢係老馮或者惡過雷公，一樣打開門做生意，「笑迎四方客，廣納八方財」，因為馬交人只望求財，唔喜鬥氣。 但係啲「雷公」殺到上門又點？咁啲老勢就要顧吓啲伙計安全同尊嚴嘞，為咗避免啲「貴人」惡爺搞搞震，首先造好道「防火門」。 阿茂叩禀大老爺，先建立一批旅遊差人，西洋人叫Tourist Police，啲摩登後生仔就話旅遊警察，專門梭巡各個旅遊區，佢地唔係凶神惡煞，個樣重要靚仔過劉德華，個款最好重大隻過阿力舒華辛力加，總之係靚仔兼世界先生咁款，因為佢哋唔單止係阿「蛇」，鎮暴安良，專門制止啲「貴人」惡棍，最重要角式，重係扮演「旅遊大使」，專門服務啲各地遊客，解答問路，幫人影相，指點迷津，同埋替失物遊客辦理緊急證件……等等問題，所以呢啲阿「蛇」好重要同特別，唔單止打得，最緊要重係睇得。 因為蓮花地遊玩行業，近年大旺，每年遊客成二千幾萬，就嚟三千萬摸頂，來客品流複雜，樹大有枯枝，流氓必有，所以必需要有旅遊阿「蛇」嚟協助同管理，此外，重要成立一個快速仲裁衙門，以火箭速度，盡量即日解決旅遊糾紛，因為嚟蓮花地玩啲遊客，通常即日或多者兩三日，就會走人。 如果有咗旅遊警察同仲裁衙門。好多糾紛就能迅速解決，甚而大事化小，小事作了，嗰陣蓮花地名揚四海，招客多來。 如果呢啲安全網衙門能夠開檔，旅遊界啲伙記就會做得安心，唔使宜家咁做到一步一驚心，但係，如果冇咗安全網，啲大老爺好似舊時咁闊佬懶理，阿茂心寒起嚟，驚怕蓮花地啲「帶街」，都上晒去嵩山少林寺，練就百般武藝、金鐘罩、鐵布衫、銅皮鐵骨，刀鎗不入，先敢下山，如果不幸言中，咁蓮花祠堂準備咗個筆「持續進修計劃基金」，可能好快用光，因為大家都爭住去少林寺學嘢，再戰江湖！ 阿茂