呼喊成本價

經屋有樓睇，有人高呼價好「抵」，有人搖頭話好貴，究竟價錢「貴」定「抵」？阿茂多角度，同你一齊睇。 近呢幾日，唔少經屋民，揸住睇屋紙，心大又心細，上樓慢慢睇，睇樓嘅權貴，雖然實唔買，卻高聲大讚，方死人唔知，經屋價錢「抵」，唔少蟻民，「夾心」嘅階層，揸住計算機，篤來又篤去，計完「擰擰頭」，話價錢好貴。 究竟「平」定「貴」，阿茂認為，唔同原意，唔同立場，唔同定位。首先要問吓，點解起經屋？最初嘅用意，係幫嗰啲冇資格租社屋，又冇本事買私樓，唔貧又唔富嘅「夾心階層」，太公幫佢，買番間屋，有瓦遮頭，俾佢安居，專心樂業，社會經濟，人際關係，和諧發展，達至富者住豪，貧者租平屋，「夾心」也有樓，各得其所，人心安穩，專心發奮嘅理想境界。 呢嗰唔係神話，早三、四十年前，鄰埠香港，英國佬政府，便曾製造出，繁榮好景像。 反觀蓮花地，老爺嗰咀話，幫助「夾心人」，但係屋價錢，貴成本百丈，似與私樓價，無形掛上勾，令到「夾心人」，望經屋輕嘆！ 阿壽都知道，建屋嘅成本，其實並不高，因何官家利，直追私商樓，利潤倍數計，「好過「放貴利」。既講幫「夾心人」，價應合買人。屋價成本計，讓欲「上車者」，盡多了願心，將來若賣屋，條款制約人。 從此角度觀，經屋之售價，應與成本「掛」，正好古語云，廣建經屋千萬間，蓮花「夾心」盡開顏。若與市場價掛勾，蓮花房奴，必被牽鼻瘋狂亂走，皆因「炒」家，瘋狂如「癲狗」！  

 ‧阿  茂‧