綠轎禍頻實有因

呢一排係嗰墟同茶居度，好多街坊父老係度嗡嗡嘈，都講間綠色轎館，啲大眾轎頻頻出事，既「宅」親人更撞死啲街坊，搞到怨聲載道。

奇怪嘅係，禍事連環間轎館，被人鬧到隻狗咁，都唔向父老「耍冧」，檢討吓自己嘅不是，嗰掌櫃仲成日出黎撐，話佢哋啲轎冇也唔妥，班轎夫仲好掂。

真係又令阿茂一頭霧水，既然啲轎同轎伕都冇唔妥，點解佢地啲轎夫「禍事連環」?

賣花當然梗係讚花香，冇邊間舖頭認自己賣啲貨係「流野」嘅。咁「禍事連環」，又事出何因?

大哥全一語中的﹕「佢哋啲轎伕抬轎唔好品」，抬轎抬到似舞龍咁，大哥成指天發誓，話一日之內，兩次親眼見啲綠色轎亂咁沖紅火，根本唔理啲轎安全，抬轎抬到滾水淥腳，好似賺番小小時間，重緊要個父老條命咁，真係唔知點解，會咁草菅人命?急得咁淒涼?

正當全村父老想穿嗰頭，百思不得其解之際，綠轎館啲轎扶，一語洩天機!近排綠色轎出咗咁多事，搞出咁多人命傷亡，原來就係為咗小小錢!轎扶話，轎館為咗啲轎抬多兩轉，賺番多啲銀両，於是掛出令牌，犒賞三軍，邊個轎扶，如果能夠抬多幾轉轎，就有銀両賞。在銀両誘惑下，轎伕互鬥抬得快，話之轎似舞龍，轉數抬得多，銀両賺得多，由此頻闖禍，害苦父老何!

掌櫃唸錯計，應該要受制，奈何大老爺，好似冇眼睇，等到闖大禍，父老爆怒火，老爺方亮相，做做騷一場。

連番闖禍，禍源歪念，監察似盲，錯不自省，少錯積大，積重難返。蓮花地，近年來，亂象頻生，難辭咎者，昏庸官，常做騷，罕實干，黑箱操作，黑幕重重，乃禍源。撥亂返正，監察規，雖公開，官商皆受監，減少利輸送，大眾齊監察始能正本源，方堵禍連生!

‧阿茂‧