澳人澳奶‧倒有理由

呢一排，澳門街，不論爹哋，媽咪，還係阿婆、師奶，同聲都猛呻。唔夠奶!阿茂唔知乜東東，到處去貢，查根究底，大聲呼喚「澳人澳奶」!!!

為乜澳門街，繁榮盛世，銀兩多多，竟然唔夠奶?皆因龍之所「害」!話說近年來，龍仔龍女，為咗響應「龍頭」呼籲，「加強科學思想觀」。埋頭埋腦，日研夜究，結果搞咗好多「科學」產品出嚟，連BB仔啲奶奶，都好科學咁話，點知原來，啲奶奶唔只好「科學」，重加咗好多化學嘢落去。最終目的，就係為咗賺多啲銀兩。

點知啲「科學」奶奶，當然用咗好多「科學」法子嚟炮製，慳咗好多料。但係啲BB食咗，個龍軀就生多咗唔少石仔。甚至提早歸西。搞到龍的故鄉，遍地愁腸。

啲龍縣外雖然好有科學頭腦，用好多科學法子嚟「縮骨」，賺多咗好多銀兩，但係就免費話哂俾全世界聽，佢地少咗好輕視而又好重要野，就係「道德」!

呢套醜劇向全世界公演後，搞到啲龍爸龍媽，唔只好傷心，重好擔心。將來嗰寶貝仲點可以再食「龍奶」。於是龍爸龍媽，四出越洋，踏越番邦，唔係找靈芝，而係搜尋，活命洋奶也!

蓮花地咁啱位於龍、洋交界之地。因此近呢一排，嚟咗唔少，尋奶龍族。踏破鐵鞋，到處搶奶，唔在講，重搞到奶價飛升，幾乎斷奶，唔少奸商，囤奶居奇。又話出招綑綁銷售，乘機「奶」一筆。

蓮花媽咪，超市，藥房竟買無奶，甚至苦苦哀求，幾乎涕淚交流，也難乞一罐奶。龍爸爸當然嬲到「媽媽」聲。打電話去公仔箱投訴，更搞到幾乎全城恐奶荒，驚恐之情，直係好似日本仔年代搶米風潮，唯一唔同，嗰陣時係打緊仗，依家蓮花地，正值歷史最繁華太平盛世!

呢嗰現象，雖然令人唸到傻，但係道理簡單不過，就係缺德既「向錢看」結果!

要解決龍的故鄉問題，可謂山長水遠。唔係凡夫俗子可以做，要搞掂蓮花地受牽連搶奶兼「食無奶」危機，就話都冇咁易，就係由官家主持，「澳人澳奶」!

此話怎解?阿茂提議，官家指定，老番藥館，專門供奶，蓮花媽咪，帶埋BB，出示出世紙，就可買奶，既平又靚，食到BB，精靈趣緻，搜奶族，只能買淨番嗰啲。

另一方面，奉勸各位蓮花媽咪，你哋當然偉大，但係偉大係母愛多，阿茂提議，求人不如求己，各位媽咪，多飲一啲，木瓜煲魚湯，谷到胸前，一樣偉大，咁就唔使驚，餓親寶貝兒!齊聲疾呼，澳人澳奶，空前偉大!!!

                             ‧阿茂‧