噪音豈怨晨運客 莫住瓊樓最上層

議事亭諸公，近日又「捉虫」，二龍喉公園露天活動場地延遲早上九時始開放，封園之「偉論」，竟謂「嘈籠籠」。此「理」若成立，「蓮花」截交通。

議事亭班諸公，唔知系咪食飽冇地「貢」。得閒得滯，竟然將晨運勝地嘅二龍喉公園，關門閉戶，要延後三個鐘頭，直到黃天百晏，過晒晨運黃金時間，先至解封，點解做得咁戇居？班老爺重振振有詞咁話，班晨運客太「嘈」，擾人「清夢」咁話！

呢單真係豬乸「捉虫」嘅典型！既歪理犯駁，又公器「私」用。首先分析「擾人清夢」。

老爺話！收到「申冤」，啲公園街坊話，晨運客太「嘈」，阿茂認為，如果喺公園內講嘢，都算太嘈，咁係隔離街川流嘅車，又算嘈唔嘈呢？人聲既然太「嘈」，要封園避之，嘈聲十倍嘅巴士等車，豈不是要停駛？而蓮花地晨早到處都咁多車又咁塞車，按照老爺「嘈」則封嘅偉論，莫非全城晨早九點前，都要封路，以保障「夜豬」安寢！？

另一方面，二龍喉公園係普羅大眾晨運這強身健體嘅勝地，唔少蟻民，打鑼咁早起身，走去公園做運動，磨練好身心，先趕返工做嘢，唔係官老爺，可以嘆到日上三竿，先至「入更」，如今黃金晨運時間，慘被封園，延到晏晒，先俾蟻民「晨」運，呢個「晨」字，晨係邊度？

再深一步，公園開放幾十年，晨運向安無事，而係先有公園才後建附近嘅大廈，如今因附近大廈住客投訴「嘈」，就要封園，究竟大多數晨運客係主？還是小數住客係「主」。誰佔多數？

最後一點，若二龍喉公園因「嘈」而封園延開，市內其他公園，是否都要「封園」！？

                                                   ‧阿茂‧