搶的世界

「買金要排隊!落訂先買到金?」。這非天方夜談!是確確實實蓮花地現實，足證蓮花地真是錢多，是否人「傻」?就要稍後才能睇清楚。

蓮花地啲金舖，天尚未光齊，就排起人龍，你擠我擠，帶住大疊銀紙，博命「搶」金，搞到金舖剛開門，又重門深鎖，皆因舖內「搶」金人潮太多，要「保護」啲客仔咁話。

點解突現「搶金狂潮」?聽講話近日金價「插水」，刺激唔少師奶、「手頭鬆動者」，「買番件嘢」，一可責吓個袋，亦可得閒攞嚟睇吓，發番個黃金好夢咁話。

既可「戴」得五光十色，又可增值，當然「搶」得「招積」，據講有豪客，挽住成袋「金牛」，闖入金倗，一擲幾百萬，又挽番幾十斤金條走。行起上嚟，一搖三擺，雙眼朝天，真係不可一世咁款。

呢嗰確實係蓮花地現實寫照。一方面，唔少人打電話去電台，一哭三嘆，話生活艱難，幾乎食都唔夠飽，另一邊廂，若有筍嘢，不論平價樓，黃金還是骨殖箱，只要有著數，就排人龍去「搶」。

蓮花地係咪真係「窮」?還係「錢多人傻」?只要睇睇呢啲社會現象，便明真相。

一個地方，不論貧富，未來有否希望，最重要嘅，係當地人嘅思想，道德風尚。若人人拜金，有金便搶，便宜便貪，此地風氣，是否正常，不難想像，難怪年前，日本地震，對蓮花地，無大影響，亦有唔少人，湧去把鹽搶。呢批盲流，不管袋中是否「錢多」，肯定被罵「人傻」，阿門!

‧阿茂‧