為工人吶喊

一年 一度，又到「五‧一」，各路英雄，按照慣例，連群結隊，又要遊行。各舒訴求，阿茂非激進，也申訴一番，社會保工人，生活與健康，希望能做到，經濟大發展，貧、富共榮華。

阿茂第一訴求，設立最低工資，因依家職場，工薪差太遠，「打工皇帝」，年薪過億，低下一族，時薪廿幾，買得煙來，吃不了飯，蓮花地，近年來，物價漲，快如飛，一家數口，細路上學，棉干碎濕，夫妻兩人，同時打工，收入過萬，也「掹掹緊」，今日蓮花地，盡管「萬元戶」，可能也屬，「貧賤夫妻」。即管相愛，也「百事哀」。

明乎此，阿茂舉拳倡議，蓮花地，應設立最低工資，附加系數，調整工資，跟隨通脹，盡管公僕，加薪點數，也隨通脹指數，唔使「事頭婆」，年年提法案，咁婆媽，自動波，正所謂，時模講句，長效機制也！

除咗保障生活，亦要保障各位打工仔嘅健康，因為健康先係第一財富，捱死咗，封個勞動模範加烈士俾你，都嘥氣。所以話，阿茂又舉埋對腳，振腳高呼，蓮花福利官，應該設立，全城打工仔醫療保險，由阿公埋單，一來可以，保障打工一族，貴體安康，二來又可幫助，私人醫人館銀両，俾佢搵多啲，水喉射到佢「水浸」，唔使佢成日哎「乾塘」，伸手板問阿公攞銀両咁醜。

如果太公聽阿茂講，嗰陣蓮花地，打工仔，心開朗，做嘢爽，又健康。個個顏開面笑，快樂指數，肯定升到天頂，各位打工仔，你話係唔係？

                                                            ‧阿茂‧