阿茂頒獎

法蘭西，影畫展，又捲起紅地毯。龍之影畫，得獎唔多見。吾及早幾年。阿茂又將個頭唸穿，突拍「大髀」，好激氣，呢一回，失良機，若派蓮花官，出洋去參展，唔攞獎一籮，亦會贏幾個! 此話怎解?皆因蓮花官，正事雖不成，卻擅於「做戲」，更身懷絕技，演起上嚟，色舞眉飛，唔感動到喊，亦俾佢笑死!君不見近日多單「大鑊嘢」，俾啲老爺，搞到大頭佛，各位老爺出場，連場好戲，罵聲、嘆聲加喝聲，全城四起。反應之烈，簡直勁過法蘭西影畫展啲戲。唔信?試舉數例，包你搶住去買「飛」! (一)最佳搞笑獎﹕話說當日，蓮花地落大水，啲蟻民俾淋咗幾個時辰，好多淋到似隻狗咁款，正係嬲到七孔幾乎生煙嗰陣，睇天衙門先至慢條斯理咁打鑼，好關心咁話俾隻「狗」聽，嗰天會落大雨，小心啲!你話搞唔搞笑?唔攞搞笑獎，嗰天都唔開眼啦!所以咪成日「喊」囉。 (二)最佳武打獎﹕呢個獎，龍的子孫過去經常攞，因為不論三腳龍同搞笑龍，功夫都好了得，連鬼子佬都預咗嗰獎俾佢地咁滯，但係，自從三腳龍牡丹花下死，搞笑龍又到處去「播龍種」，武打獎呢排都攞少咗好多。但係，蓮花地近日落水後，搞到「大頭佛」，成班老爺係公仔箱嗰「追悼會」上解畫，竟然瘋狂「互插」，連同僚都冇面俾，明槍、暗箭，招招毒辣夾攞命，睇到啲父老眼眨眨，好似重勁過三腳龍同搞笑龍啲勁招，如果將蓮花官啲互插功夫，攞去影畫展，肯定又贏番嗰「最佳武打獎」番。 (三)最佳懸疑劇本獎，呢嗰獎本來好難攞，因為嗰劇本要好有唸頭，龍的子孫，雖然功夫了得，唸嘢好似重差鬼子佬一皮，故此，呢個獎，長期以來，多數都係獎俾福爾摩斯同日本仔嗰羅生門。但係今年又唔同，早一排，蓮花地有幢洋樓，突然「座」咗落，無啦啦俾人話係「危樓」，仲搞到出大差去封樓咁交關。蓮花尊者都要冒生命危險，御駕親征，探其究竟! (四)結果，經過成年流流長，土地公衙門仲請埋桂枝埠個大學士去望，聞、問、切，明查暗訪，整咗叠大「快佬」出，雖然土地公老爺實牙實齒話係「偷工減料」，但係邊嗰「孭飛」又朦朧迷離，搞到唔查尚清楚，查咗成年，邊嗰「孭飛」仲唔清唔楚，你話劇情幾咁詭秘迷離。仲唔攞最佳懸疑劇大獎，阿茂真係「死都唔眼閉」。 以上舉出幾個例子，實在滄海一粟，蓮花地啲異能怪事，好似阿一哥嘅口頭禪咁講，簡直係「罄竹難書」! 因為篇幅有限，唔想阻老總同列位看官嘅時間，如果各位唔同意，他日再拗之。趕去買書飛先! ‧阿茂‧