庸官嘴臉

 轎局長，終出場。面對全城共責，日前開腔，打圓場。不鳴則已，街坊父老，觀演後，心更涼。眼見証據確鑿，父老罵到開巷。局長未敢頑抗，採取「以柔制剛」。更扮「楚楚可憐」，伺機開脫，大打官腔。講乜嘢，「如果查到奸商，有心呃欺銀兩，或會唸吓，追討到「公堂」。不過佢又「留底」，暫時唔想，出動「巡捕戶」。

茂爾摩斯聽到驚呼，大局長做嘢，雖然冇乜斤兩，「偷天換日」，詭計可比「張良」。試想，個張「賣身契」。表面睇嚟，應該度身訂造自官方，如今發現，咁多坑洞，俾啲奸商，讚到通透。轎老爺話，如果，「查到」!?

蟻民不禁要問，張「契」行咗咁耐，老爺都冇查過咁得咁「橋」要由另一個山頭篤數公先「篤」到出嚟?換另一個角度講，就算鞽衙門啲老爺咁純情天真，揸住張「賣身契」，成年幾兩年，更同啲公交橋商，同襟共枕成兩年幾，都唔知道佢啲會另一邊廂去「鬼運」，咁又得咁「橋」，有好多蟻民不斷飛電去「大聲公」個檔口度，話佢啲好早之前，就發現啲公共轎立心不良，經常趁空檔，或摸黑去「鬼運」，有啲激氣父老，重咬牙切齒，實咁話，佢啲仲帶埋轎衙門的公差，早就到料，點解依家轎老爺先到話去「查」?

再退一步諗，假如篤數公篤出嚟啲料同蟻民所講係「真」的!咁呢單嘢就唔係「錯漏」咁簡單，可能係官、商「串謀詐騙」，但係轎老爺偏偏依家唔想出動「巡捕房」嚟查，自己則上演「騎喱啡」化裝—「自己查自己」，你話幾咁「合邏輯」呢?

不過，成套戲之中，最令人「心寒」就係在千呼萬喚之下，轎老爺以力敵萬鈞之勢，死都唔肯「光榮引退」，而係要「歇盡所能」!更令人嘆息又心寒，大家都睇到，經過咁多年，轎老爺有幾多「斤兩」，路人皆知，佢能「歇盡」到何「能」，相信只能苦笑。不過，另一邊廂，有一位仁兄，可能更心寒!就係篤數公，如果佢諗諗雙方「背脊」，能不

冒汗「前車可鑑」也!

茂爾摩斯