唔信政府

蓮花地、又出奇、高官、尊者，「誓願」越多，疑心越起，為保「飯碗」，「立法」聲喧，禁入外勞，此落彼起!因何咁奇?皆因「老爺」，過去歷史，呃怕蟻民，信佢都傻。 自從蓮花地，化身大賭坊，名揚遍天下。係賭坊當「官」，成為「打荷」。入息不俗，星斗蟻民，當然可喜更可賀。 一日當荷官，好似登龍門，即刻成中產，買「辣車」，供洋樓，衣著光鮮，穿戴名牌，更可養番狗，羨到隔離埠，桂枝同五邑，甚至賓哥妹，大多口水流。 可惜，花無百日紅，零八年，金融風暴，「雷曼兄弟」，認真衰仔，股、樓價插水，全球嘅經濟，都跟住佢衰，今回認真係，累埋D兄弟。 吉祥賭坊，各大老細，不論華洋，攬埋一齊，猛咬耳仔，度出「好計」，首次聯手，共耍伙計，有難同當，即刻放假，人工當然冇得計。 常言道，由儉入奢易，由奢返儉難，呢班「官女」、「官仔」，突然少咗錢使，當然好難抵，呢一班「官」，人數之眾，佔蓮花地，中產近半。不少都係，消費主力，又同時係，家中棟樑。好似領導人咁講，係蓮花地經濟，「核心利益」。 雨過天晴，環球經濟，又復好睇，正在此時，番邦老勢，突係外面啼，呻本地伙計唔夠使，重諗咗好多計仔，話D外地學生，可以留低，賓仔，印傭，內地勞工，可以搖「骰仔」。 經此一役，証明古語，「同甘苦易、共榮華難」，本地「官仔」，當然「發威」，連場上街，力保個「碗仔」。 另一邊廂，尊者、財爺，又演舊戲，誓神劈願，「一日有我，官仔唔餓」，聲情並茂，講到依層層，似真更肉緊。 可惜，演技依舊，「官仔」唔領情，更連番上街。今回連「工頭」，更率領工友，踩到上門口，要求立法，禁入外勞，搶荷官位，延及「車頭」。 點解大老爺，力竭夾聲嘶。演得咁神似，工友仲咁疑?道理好簡單，誓神劈願，「有我有你」!係「法治」?還係「人治」?根本一句話，「民無信不立!」大老爺信用，級數剩幾多?工友反映，一眼便知!                                            ‧阿茂‧