研究調查新發現 刷牙防老人痴呆

睇親牙膏、牙刷廣告，仲以為刷牙最多都係能夠保持到口腔清潔，最多都係預防埋口氣同埋牙周病，不過有科學研究就發現，原來刷牙唔單止可以保持口腔清潔，仲可以預防埋老人痴呆，以後牙膏、牙刷廣告話唔定會以「預防老人痴呆」為賣點都唔奇喎。

英國中央蘭開夏大學就近日意外發現，原來刷牙可以預防老人痴呆；據研究所得，一個每日只刷一次牙老人家，比起每日刷三次牙老人家患上老人痴呆機會高出達到65%！除此之外，原來呢項研究亦提到，刷牙唔單止可以預防老人痴呆，同時就連患上心臟病同埋糖尿病機會都可以大減。

刷牙同預防老人痴呆好似大纜都扯唔埋，而呢項研究亦解釋到，可能係因為老人家特別注意牙齒健康會間接動腦筋，同時亦因為注意飲食，所以令到患上老人痴呆、心臟病同埋糖尿病機會大減。雖然呢個解釋似乎係非常勉強，但係總算係有解釋支持。