為大法師搶不平

蓮花地，冤枉案經常有。這一回又一樁，被『屈』著，竟然是大法師。唔係講笑，時聞紙引述，『善豐』嘅『若主』，感覺大法師誤導『遊花園』浪廢時經年，更覺佢『無能』。

此料一爆，非同小可，簡直好似『石破天驚』！堂堂大法師，躬身為黎民，竟然被『錯』覺，豈天大『冤案』，一定要申冤！

阿茂睇到『鼻哥窿都冇肉』，幾乎慌到震，此話怎解？又百思不得其解？

唸咗半日，幾乎唸穿咗個頭，終於又想出咗少少『理由』，馬上要替大法師申冤，除咗捍衛賢臣外，仲有少少私心，希望他朝有日，『申冤』成功，獲大法師垂青，做番個狀師仔，咁就家肥屋潤，因為係蓮花地，對簿公堂，係好『肥』，開金口一趟，唔搵一億，亦幾千萬也。

首先，『苦主感覺大法師俯慰蟻民，傾咗成年幾計，雞啄唔斷，為帶蟻民『遊花園』呢種感覺實為錯覺。

因為大法師每次嚟傾計都心中有『底』，若『柯打』話要整單『芝麻糊』，當要慢火嚟熬，直到又黑又傑，先至似樣，亦唔怕欺君犯上，按本子辦事。梗唔能夠滾淥腳，搞到蓮子百合糖水咁快趣清晰。如果樣樣事，都做得快趣清楚，咁好多『貴人』，就會『錯失』『豐碩成果』唉！

縱使感覺大法師帶人『遊花園』係真，亦都係『入鄉隨俗』，唔係獨家之過，祠堂邊單嘢，唔係拖滯經年，一拖再拖，係蓮花祠堂傳統中，大法師又唔算拖得好突出。即使係議事堂同公仔箱，問答遊戲中，眾老爺照樣經常大眾環視下帶蟻民『遊花園』，眾官皆如此，豈能獨責之。正如俗話所言，『罪不責眾』，因此，大法師被覺『遊花園』，罪不成立應還其清白！

另一方面，大法師被苦主感覺「無能」，理由則更加不成立，已經一年幾，佢經常出嚟，同苦主傾計，雖然無功，應記其苦，況且，年幾長，做唔出嘢，亦唔算長，有啲卿家，十年八載，一事無成，亦閒事也。比較之下，大法師，豈說無能，盡管算真，亦「瑕疵」矣。明乎此，「無能」之議，理據不足。再者，比較大法師之「事頭婆」，他更顯得正直，大法師又冇貪墓地，又唔會收埋啲「快佬」，更經常臨危出嚟做「擋箭牌」，經常捱「苦差」，實「委屈」也。

大法師，如此好公僕，卻被蟻民誤解，冤枉，各位看官，你話係咪，包公含冤，岳飛背中箭咁慘，真天下冤案也，應該早早，飛奔公堂，擊鼓鳴冤！

‧阿茂‧