罄竹難書

篤數公，今回又篤出個「大姑窿」，主角又係「罪行累累」嘅「土地公」衙門！篤出罪狀，多到「無窮」，有如舊一哥名言，簡真直係「罄竹難書」咁話。

被篤嘅項目，就係氹仔個公園，本來喱種工程，只要按章辦事，就唔會有「瘕疵」，但係偏偏唔知點解，「土地公」衙門班大細老爺，好似學咗濟癲和尚咁，亂嚟一通，好似整兩個水池，本來份「則」寫明，大細兩池係互通嘅，點知班土地公老爺，問都唔問吓，就係中間封咗佢，到做好之時，用家一睇，嘩一聲，不得了也，因亂咁改「則」，搞到活水變死水，會搞到水都臭晒，仲有安全隱患，後患無窮，結果又要拆過，嘥咗唔少光陰及大筆銀兩。

篤數公仲點出，土地公衙門班老爺，真係唔知係咪唔識做嘢，還係好似飛仔亂飆車，不論停車場、圖書館同泳池，升降機同空氣監測器，質量多千瘡百孔，問題多多，但照樣收貨，唔顧安全不打緊，後患無窮害死人。

篤數公指責，祠堂本來有皇榜，但係班土地公衙門老爺，唔按規矩做嘢，結果，唔單止工程延誤，重嘥咗成幾千萬，對於交唔準貨班員外，就單晒眼俾佢地過關。好似唔使負責咁！

點解班老爺咁亂籠，無他，過去好似冇皇管咁款，且是習慣成自然，唔怪得歷來祠堂大工程，多搞到一塌胡塗，嘥大筆銀兩及浪費光陰，出嚟嘅貨，又多豆腐渣。

呢啲係技術問題？還是係心術問題？點解蓮花祠堂開檔以來，大多「大劑嘢」，都搞到一團糟，正係貼了夫人又折兵，近年更搞到官司纏身，打官司打到「失暈」！問題嘅癥結係邊度?！明眼人一眼就見到，唔知土地公衙門嘅失憶老爺同工部大老爺又知唔知！？咁就考吓佢哋嘅「智慧」嘞！

‧阿茂‧