控煙戰或有彎轉

控煙拉鋸戰，峰迴又路轉。「護煙」幫陳詞，力歇又聲嘶，官字初放話，若方案可行，可能「有彎轉」!

加煙稅通過，煙商即囤貨，除咗加價外，更唔准買多，個別之煙商，「封盤」話「冇貨」，「可憐」之「煙精」，蛋家雞見水，見煙「冇得吹」。

按照常道理，若然趁危機，即囤積居奇!囤貨之「奸商」，當被人鬧死。這趟卻例外，對「封盤」煙商，阿茂「錫」到「痺」!

此話可怎解?內情頗蹺蹊!吸煙有何益?百害無裨益，花錢損健康，上癮更沮喪!應少吸為妙，加稅為吸少。如今加煙稅，減煙民狂吹，煙商若「封盤」，煙精無貨吹，變相減抽煙，減上癮「升仙」，挽救多眾生，效果大大善，阿茂大鼓掌，「囤煙」商應獎。

又看另邊廂，立會議事堂，各路大高人，自分成數幫，關姐禁煙派，當放聲大哎，吸煙確害人，禁煙護眾生。

另有護煙派，馮大炮，擔頭牌列，舉多「道理」，數控煙「無理」，大炮舉一例，十里長沙灘，清風吹繞環，也要禁吸煙，此例實「怪誕」。「大炮」雖勁揪，常識卻不夠，澳門最長灘，路環黑沙灘，最長之里數，僅得一點五，兩公里不夠，那另有沙灘，長達八、十里，「大炮」更自稱，為資深煙民，對地理常識，卻如此誤識，可能吸煙多，煙薰腦諗錯。

唯有鄭安庭，理據仍可聽，佢話多博企，已設吸煙室，「煙精」室內吸，煙室建密實，二手煙難漏，對荷官、職工，健康無害有。當局推控煙，目的護職工，健康莫危害，現設禁煙室，已隔癌物質，又便賭客吸，兩者皆照顧，何須「趕」到「咳」!?

這回大司長，初開腔放話，若大家提案，可行性確實，政府當考慮，轉灣可能得!

‧阿茂‧