一做就衰嘢

真個是﹕平時唔做嘢，稍做露衰嘢! 這句俗語係形容啲無能、昏庸之人。日昨轎衙門作出之新猶，就正好應咗喱一句話。

話說轎衙門俾人鬧咗多年，避無可避，終於日昨拋咗份「整治」黑的嘅「坡席」出嚟，俾啲「師爺」評頭品足，皆因蓮花地啲「黑心的」確實太狂妄，「斬」到啲客好鮮血淋離，仲演出個假象，搞到蓮花地好似個「屠場」咁，啲客仔被「斬」到罵聲四起，仲嘈到過隔離埠，令啲蓮花蟻民，怒髮沖冠，啲有頭有面嘅上大人，則無地自容，幾乎要學啲阿拉伯婆咁，要戴上面罩，方可示人，皆因真係醜到冇面見人是也!

本來轎老爺「的」起心肝，係千呼所指下拋出份嘢出嘢，誓神劈願咁話，今回真係要搞掂啲「黑的」，唔再俾佢為非作玉咁話!?

點知啲蟻民，睇清份「嘢」，就唔知好嬲定好笑，皆因份嘢好「無喱頭」，又長、又沉，仲好繁瑣，好似紮腳婆條陳年紮腳布咁嘅款同味道，總之一句，吾埋得鼻，更加羞家，最後結果，鬥咗一輪數之後，就自己撇數，起唔到震攝作用，仲俾的哥大佬笑佢「冇料到」，實行計分制咪得咯!

不過，有啲師爺就話，呢份準皇榜雖然係隔靴搔癢，「冇牙老虎」，只係裝腔作勢嚟做騷，但以蓮花祠堂嘅衙門嚟講，尤其係轎衙門嘅一貫表現，已算係輝煌業績，因為皇榜，畢竟係有好過冇，好過以前，只講不做，甚至索性，躲於衙中，千呼萬喚唔出來。

不過，呢份皇榜，佢嘅特色同蓮花地同類嘅，亦十分雷同，就係得個「樣」，騷俾人睇吓，講實質，冇牙力，近乎有似若冇，好似「龍門客棧」，包公法咁……

所以，蓮花地祠堂，開檔以來，雖然皇榜多多，但都好似冇皇管咁，因為每多皇榜，內容無力，執法腳軟，做套戲，睇吓啫，唔使咁認真!

‧阿茂‧