蓮花官嘆慢板惹民怨

蓮花地，疏打埠，真係無奇不有。一個賭鬼，輸光銀兩，百無了賴，走去玩企跳，官府大陣仗，派出成百「阿蛇」同消防鬼，仲出埋民裝嘅談判專家，「跟」個賭鬼去「玩」，由天光「玩」到天黑，幾乎「玩」足成日，「阿蛇」當然吾會俾佢「玩謝」，因為可以輪更，可憐嘅係啲蟻民，返工放學，成個北區，幾乎就俾個賭鬼玩到「企係度」！

點解個賭鬼咁「威」！？幾乎玩到啲阿蛇冇乎？驟眼睇，好似個賭鬼「法力無邊」，成班差佬、消防俾佢「擰」到陀陀轉，睇真啲，其實係我哋啲官老爺太「心軟」，生怕「行動激烈」，會「損害」賭鬼嘅毫毛，再睇深點，先至發現，係呢套「戲」裡邊，確實反映出，蓮花官老爺嘅慣常「信念」，對蟻民影響，更少上「心口」，拖到難再拖，方才來解救!

點解咁講，類似企跳，蓮花鄰埠，經常見有，鄰埠「阿蛇」，消防營救，做好防範，談判過後，常快出手，一般兩、三個鐘，若然更快者，一粒鐘唔夠，便「搞掂」走頭，避免企跳者，阻生活節奏！

唔似蓮花官，寡斷更優悠。睇賭鬼做騷，俾佢「揀」住舞，由早騷到夜，害街坊父老。

皆因蓮花官，承「西洋」習慣，凡事嘆慢板，所以乜輕軌，物碼頭，拖十年八載，亦算你好彩，做事得慢慢，確保官老爺，嘅金科玉律，至於民啫怨，睇見唔入眼。

今回呢場「騷」，玩咗十八鐘，若成「好」先例，將來之賭仔，慣例又輸光，排隊做騷睇，企跳市中央，或企在大博企，到時蓮花官，舊例來「處理」，陪賭仔「出騷」，蓮花地市面，將會一團糟!

經此一教訓，官衙應檢討，以後再遇「騷」，應如何去做，續「做得慢慢」，還再跟佢玩！？

‧阿茂‧