戲說國寶命名

蓮花寶地，認真當旺，吉祥賭場，贏盡各方，財源滾滾，太上「賢」君，愛澳備致，恩贈國寶，熊貓寶寶，即將來澳。大管家婆，更加發起，冠名大賽，全城動腦，想個好名，歡迎國寶。 管家婆話，今次比賽，最終目的，定個靚名，俾雙寶寶，一男一女，名可三語，既中可葡又英，因為濠江，一國兩制，華洋雜處，沒有洋名，被覺好「薯」。洋名之中，除咗「紅毛」，亦要「西洋」。咁先顯出，蓮花寶地，「瓣、瓣」都掂，冠名若響亮，更加會有獎，祠堂已準備，獎金送銀兩，阿茂為小人，見錢瘋狂，即棟起床板，由三更半夜，想至日上三竿，幾想光個頭，還幸皇天不負有心人，終於想出個名堂，幾個靚名，音意俱佳，更貼合蓮花地實況。 國寶靚名一，「陽陽  光光」。寓意照蓮花地。絕無黑暗，腐敗咁解。因為前朝蓮花祠堂，做嘢手腳吾係咁利落，被人鬧到「口黑面黑」，搞到蓮花尊者，新登寶壇嘅時候，即誓神劈願，要多照陽光咁話。所以國寶光臨，個個叫佢陽陽、光光，叫吓叫吓 ，嗰啲都係咁嘅色嘅各閣公差，「自然」會良心發現，洗心革面，做番個好「公僕」，但願如此，成敗在天。 跟住個「紅毛」名，囝囝應該叫「威廉」，囡囡就叫做「瑪莉」。個名嘅意思，希望祠堂啲公差，對住個「大老勢」做嘢時候，要威，千其吾好見到個契爺就腳軟，攪到啲違法加建或非法旅館，管來管去，管足成十年，都咁手軟。「瑪莉」更加吾使解釋，對「馬」交有「利」也。 講到個「西洋」名，哥哥最好叫「包路」，妹妹應叫「花地瑪」。因為鬼子佬聽來，「包路」，「包路」，來到濠江，包你行正條好路。邊個西洋鬼佬吾想嚟濠江？咁樣吸引人材，保正蓮花地，吾怕有人材荒，到時啲法官、律師外勞，重多過啲地盤坭工，咁蓮花地嘅「法事」，必定興旺順暢，無須大動手術，法界改革，自然事半功倍，對「澳人」與「鬼」兩者皆益。至於花地瑪，更是蓮花地之招牌，「花花」世界之「地」，就係「馬交」。你話幾咁貼切，呢個冠名「大獎」，如果唔俾「阿茂」，真係天吾開眼，就要叫多幾聲「陽陽  光光」。                                               ‧阿茂‧