盲官黑帝累街坊 一場暴雨‧兩行眼淚

蓮花寶地，常演好戲，唔怕激晕，也會笑死，一場暴雨，官場鬧劇，即演「好」戲。 話說昨日蓮花地，天還未光，已烏雲蔽日，暴雨連連，不管「夜香婆」或派報紙仔，早已狗走雞飛，紛紛迴避，即使天光，ＢＢ班細佬女，見到烏雲咁黑，亦識叫媽咪，擔多把遮，兼著雨褸。先去番學。皆因腥風暴雨，真係連盲公都「聞」倒者。 最奇嘅係，遍遍儀器多多，既有千里眼，又有順風耳嘅蓮花「欽天監」閣門，卻就遲遲唔打鑼告急，等啲星斗蟻民番工番學，唔變「落湯雞」，就淋到似隻狗咁。搞到怨聲載道。 本來，蓮花「欽天監」睇錯眼，已經係慣例，正如星斗民講，信佢不如信吓啲六合彩運氣，命中率或者重高啲。最奇聞嘅係，「欽天監」為咗補鑊，後尾出榜安民，話佢閣門早已經知道會雨落到「冧山」，早想打鑼告急，但係想來想去，又唔知打唔打鑼好，於是又去問「卜卜齋」閣門，點知「卜卜齋」閣門班公差，又係咁「符碌」，又話今日咁啱各「卜卜齋」學堂考秀才，打鑼怕驚親班舉人，茲事體「大」，又怕孭鑊，索性奉行，官場金科玉律，實行鬥「側側膊」，趁天色尚早，即行「晨操」，兩個閣門，閉門互「打太極」，互相「推手」，功架重威過詠春宗師。 由於「推手」「需時」，等兩個閣門互推到手軟時，咁啱又到咗「入更」時間，先至「打鑼」，認真「按章」辦事，等班「落湯雞」蟻民聽到鑼聲，望望自己淋到隻「狗」咁樣，真唔知好嬲定好笑。 班蓮花「公差」咁「符碌」，並不算奇，更激死人者，其後發出嘅「安民榜」，更振振有詞咁話，皆因「卜卜齋」閣門嘅教仕，為咗唔阻礙考秀才 ，因為佢地係「推手」期間，已番咗學堂，至於佢地淋成點？其他蟻民點解又要冤枉捱淋，公差就唔諗得咁多矣！ 聽到公差嘅「偉論」，幾乎被雨淋「死」嘅蟻民，又幾乎被激番生，蟻民不禁要問？「打鑼告急」，唔係最已訂咗規佢嘅咩？幾時「打鑼」，唔係根據現實數據而定嘅咩？點解由啲「符碌」公差，隨意根據自己嘅「暇想」定，更有甚者，公差曾經話，幾時落錘「打鑼」，重要稔吓吉祥賭場的客仔而定，如果佢講係啱，乜嘢叫做科學決斷，乜嘢叫做「科學思想觀」，要啲科學儀器嚟做乜，不如借阿茂把鬼王扇，俾佢拍後尾枕就得啦。 更可笑者，醒目時聞佬，見班官仔咁「符碌」，走去問佢個老細，司長大老爺更語出奇言，話兩個閣門自己有規矩，官仔點「符碌」，不如時聞佬自己去問佢地啦。 時聞佬聽到「奇言」，更胡塗過個官，唔通連司長大老爺，都管唔掂班「符碌」官仔？要時聞佬幫手？蓮花地官場之「符碌」，又多一「碌」？！ 前一陣子，教、文司老爺曾雄心勃勃，勸啲秀才加「圓外」，努力合作，係蓮花地推行創意文化產業，希望發展蓮花地嘅文化、旅遊產業，教、文司一片好心，眾人皆知，其實，蓮花地經常上演咁多奇聞官場好戲，唔使大文豪出手，只要搵個寫字仔留意吓官場，耐唔中筆錄吓的「符碌」怪事，唔使幾耐，保証大把名作登場，怪論，鬧劇。官場奇聞，保証好睇過「老殘遊記」，「官場怪異錄」，名作迭出，當然會蜚聲國際，大家都湧嚟蓮花地爭賭奇聞怪事，到時蓮花地旅遊，想唔「爆棚」都幾難！信不信由你？                          阿茂