霸住銀両冇蝕底

議事亭高人發牢騷，鬧衙門，多老爺，亂要錢，唔做嘢。浪費公帑。管家婆，易放數，似闊佬。阿茂認為，應該立例，從嚴睇數。 議事亭，又開檔，睇官衙啲數簿，竟然發現好多衙門，成日話好多嘢做，猛叫太公攞錢，收咗錢後，卻唔做嘢，或只做少少，大量銀両，就雪藏係嗰夾萬度，唔知做乜，成個蓮花地祠堂，最「勤力」嘅衙門，用咗嘅銀両，只係嗌數嘅三成幾，所有衙門，平均起嚟，做嘢花用，只係嗌數嘅兩成幾，甚至有八個衙門，擘大嗰口，話要做嘢，點知收咗銀両，就全部「雪藏」。「橋」埋對手，乜都唔做。只係攬實啲錢。 真係可怒也，而家蓮花祠堂，究竟係唔係花花公子俱樂部，啲老爺係咪花花公子。亂咁向太公伸手，佢哋隻手，係咪只識攞錢，唔識做嘢。大拿拿，億億聲，隨時伸手，亂咁開口，更離奇嘅係，管家婆，咁寬容，成個黃大仙咁款，有求必應。雖然近年，太公豬籠入水，祠堂水浸，銀両多多，都唔好咁亂攞吖。 諗番轉頭，早排，蓮花尊者，預告出年「戲匭」嗰陣時，對啲星斗蟻民，燃眉福利，開刀大斬，重口聲聲話，要儲番啲銀両，以防不時之需咁話，當時表現得佢好「慳」家。點知言猶在耳，佢手下都亂咁嗌數，亂嗌唔打緊，最臭嘅就係，班花花公子，「佔用毛坑『拉屎』」。 阿茂雖然嬲到嗰頭爆青筋，好彩重頭腦清醒，聽啲高人話，叫管家婆以後，唔好咁易放數，睇緊啲盤數，阿茂話，講都多餘，不如學隔嚟桂枝，規定出數到幾大，盤數一定要攞去議亭申請，俾啲高人睇吓，諗清諗楚，先至落鎚，唔好俾啲老爺，「爺爺」相惠，咁太公啲銀両，先管理得理想！你話係唔係，一於趁快立例！ ‧阿茂‧