公僕出差就係皇帝

前一排，蓮花地篤數公又篤出啲臭野，揭出班公差出外花天散錢，食嘢狂報錢，更且發其「皇帝夢」，係唔係都要豪住「皇帝套房」，種種「臭嘢」，都揭出一股臭穢，就係祠堂「生蟲」。 此話怎解？阿茂今次又唔係做餅，冇嗰樣嗡嗰樣。而係有根有據者，因為根據篤數公衙門篤出嗰條臭數，祠堂十幾個衙門，啲公差成日湧出去外地，「為民公幹」，所幹何事？星斗蟻民，當然唔知，但係篤數公篤出條數，真似天文數學，連替阿公捱咗幾十年大議員，都話離譜。 好似住客棧咁，連啲九品芝麻官，動不動都話要住皇帝套房，瞓一晚就嘥咗蟻民啲血汗錢成萬幾銀，而且唔係一個衙門啲官仔係咁嘥，吾少衙門都係咁，啲官仔有樣學樣排晒隊，你大嘥時我更嘥直情當太公啲銀兩係水咁洗，好似花花公子咁款，慣晒洗腳唔抺腳，啲公差唔單止係花花公子，博命亂花，仲係帝皇花花公子，因為唔怕「老竇」鬧，帝皇套房有得瞓唔怕震，你話係咪帝皇級花花公子。 重有另一樣臭嘢，就係篤數公揭出嚟，有啲「盡職」「勤儉」公差，連外出公幹都搏命狂食「口立濕」，話梅、瓜子、朱古力同波板糖「突然」食到多得「驚人」，更「難得」者係佢地都「盡心盡力」，巨細無遺咁將啲零食錢報晒出嚟，好似話俾阿公聽，佢哋係外邊除咗嘆豪門貴讌外，重好「認真」咁狂食「口立濕」嚟「補身」，以免「捱」壞身子，失「孝」子民。 蓮花地啲公差點解咁鍾意外出，帝皇享受同狂吃零食？阿茂又幾手諗穿頭，先至好似諗出個理由，就係除咗滿腦帝皇奢欲外，重有唔少公差「生蟲」！ 呢個理由可以由兩個現象解釋，就係唔少公差一年到晚，匿埋係衙堂，甚少做嘢，盡管經常鑽動，好多時係為咗鑽「油水」。呢種現象，顯示佢哋嗰腦可能生咗蟲。既然嗰腦有蟲，啲蟲好自然往下鑽，藏於肚中，油水更多，更加好食。因此，公差出外，舟局勞頓，消耗比匿係衙堂外，自然補充便要更多，所以除咗要盡享豪門貴讌外，更要時刻狂食「口立濕」，「補充消耗」。 根據以上論斷，蓮花地公差外出公幹，狂花公帑，乃屬「正常」！更是為了公差「健康」。不過，既然「生蟲」，為保障「健康」。自然要為「生蟲」公差「杜股瘴」，名醫何尋？並非「華陀」，點解會生蟲？一言蔽之，物必先腐而後蟲生！若喺祠堂找，要搵「包青天」，因蟲之所匿地，主要在腦。對準目標而「杜」，自然全身皆清，問題是，蓮花包公，有意杜蟲否?! 阿茂