愛國就要學好普通話

阿茂睇新聞，睇完嬲到「震」，工聯會調查，蓮花地鄉親，識講普通者，僅得三成人！ 你話幾羞家，今日蓮花地，回歸中華地，已經十幾年，中央嘅大人，全國嘅親朋，南巡多少次，對澳人訓話，無微嘅關心，都講普通話，講咗十幾年，直至到如今，才有三成人，識得普通話。回歸咗咁耐，高官與名流，誓神又劈願，愛國又愛澳，講起普通話，水準何其差！ 今日蓮花地，龍頭嘅行業，博彩與旅遊，湧來嘅遊客，佔咗六成幾，都講普通話，旅遊之名城，六成幾鄉親，竟然唔識講，點樣招待客？點樣辦旅遊？卜卜齋衙門，喺呢十幾年，推行普通話，究竟做咗乜？ 調查結果話，八成幾市民，大家都讚成，大力推國語，阿茂更舉腳，加零一推行，具體嘅辦法，學番西洋鬼，馬介休時代，唔識講「化啦」，西洋嘅官話，不論大小官，一律要落馬，皆因大中華，係我哋國家，全民講國語，必然本能也。不單中國人；各國番鬼佬，爭學普通話，睇睇歐、美國、孔夫子學院在各地開花、學生擠滿堂，最佳明證也，身為中國人，國語都唔識，笑甩人大牙。 阿茂又做餅，提出新建議，卜卜齋衙門，從速訂方案，蓮化地學堂，都要增課程，強推普通話，考試唔合格，唔升班、畢業，官員唔識講，降級更減薪，限定時間內，學極都唔識，一律要撤職！ ‧阿茂‧