由延遲通報想起修法

這一陣子，蓮花地喧鬧非常，皆因時聞官打鑼，話要同父老傾計，諗吓應唔應該，整番個「籠仔」，罩住班「時聞佬」，唔好俾佢「亂呔」， 咁啱又得咁「橋」，蓮花地有個過氣捕快，為咗同紅顏知己出頭，衝冠一髮為紅顏，「掹」咗支「狗仔」出嚟，響咗一嘢，幾乎打親嗰寃家黑鬼，攪到嗰墟雞飛狗走，風聲鶴唳，好似大災難咁款。 差大哥雖然好快殺到，鎮住一切，但係當知道呢個「英雄護美」嘅主角，原來係自己人舊「伙記」，就唔聲唔響，帶晒返區就算數。現場攪成點，有冇搜証，保持現場環境証據？咁就問阿壽都唔知矣。 後來俾人知道嘅，就係連專門查案嘅威龍猛探，都要喺「響火」後個幾鐘頭，先至由「軍裝」報料，落去「睇嘢」，「響火」現場嘅証據，重剩番幾多？唔使講，連弱智仔都想到啦！ 至於觸鬚長長嘅醒目「時聞仔」，亦都喺被「及時」「冚住」，直到乜都過晒氣嘅時候，先至由衙門「放料」出嘢。 鬧市響火，危及生命，咁大單嘢，反應點解咁「慢」。無他，因為主角喺過氣「伙記」也。處理過程，有冇偏袒？稍有常識，都會想到結論。一句講晒，執實權者，肆意妄為！有權大晒！乜都想冚實晒！ 如何監察？制衡濫權？喺今日蓮花地，乜監會？物政公署，按照現實記錄，只能隔靴搔癢，作用不大！ 能起實際作用的，應該是社會「第四權」──傳媒。她應該是社會不法現象之監察者，揭露者，或許可能還是社會病態的「醫生」。最近，有人重提要修法「管理」傳媒，還口口聲聲話冇預設「立場」，但是，經過近日之「表演」，再結合近日發生之「實況」，不言而喻，「立法」之目的何在！？若傳媒再被「立法」「管理」。手執實權之「妄為」者，將會「妄」到何等程度！                                            ‧阿 茂‧