轎事多蘿蘿

蓮花地，呢一排，啲轎夫，真當黑，好似隔離埠桂枝，啲摩登「督爺」同夢想督爺咁，成日出事，唔係自己撞板，就係俾人揭開個肚腩，揚晒啲衰嘢出嚟仲成日俾人鬧，慘過街邊落水狗。 隔離「督爺」嗰名咁臭，皆因自己攞嚟衰。咎由自取。但係蓮花地啲轎伕，與人無仇，點解又咁「該燴」?皆因為個貪字。 蓮花哋啲「大眾轎」，舊年開咗新規矩，三分天下，由太公餵肥仔水，個個都有得飲，嗰規矩仲有啲特別，每間轎館，如果嗰口擘大啲，太公就灌多啲肥仔水佢飲。 天下商賈多喜奸，一間公共轎館嗰掌櫃，為咗飲多啲肥仔水唸咗個屎橋，於是綁個紅蘿蔔係頂轎前面，趕啲轎伕抬快啲，仲話邊個抬得快，就可食得多，利之所誘，啲轎伕就跑得好似格力狗。可惜公共轎伕只係想住食，就吾理頂轎抬成點，經常搞到人仰轎翻，仲搞出人命添!另一邊廂，「的的轎」因為轎伕係自搵自食，梗係專揀「肥羊」嚟劏，被劏嘅多數係過路羊，就算捱咗刀，都唔得閒同啲轎伕理論，故此，一路劏得好順手，亦無後顧之憂，點知，咁啱劏著嗰鐵娘子，唔止巴辣，背脊仲夠硬，報官起嚟，阿SIR殺到，出埋「孖葉」，貪惡轎伕，送官查辦。 其實轎伕所為，雖錯非嚴重，但屢屢不改，搞到怨聲載道，滿城指責，神憎鬼厭。其實搵錢，手法好多，君子愛財，取之有道，亂來轎伕，雖非多數，一粒老鼠屎，「弄壞一鍋粥。只要守法，正路求財，長搵長有，反正蓮花地，轎伕之數，根本唔夠，若做得好，錢唔憂收，何必殺雞取卵，自取其醜? ‧阿茂‧