延報耐人尋味

豪華客棧，日前唔多「棧」，幾十個「小二」，被困摩登吊籃。唔上唔落，好似攞條命仔嚟玩。

咁都未算令人「標」冷汗！更令人心寒者，就係官家，蓄意延報，延誤時聞仔，知道呢鑊嘢，原來咁大單。

咁佢又點大單法？困三十幾人，已經係蓮花地呢個世紀嘅大時聞，再者，消防鬼已經認為，呢單嘢係「大型事故機制」！出晒大差，火速搶救，重分散「小二」去幾間醫人館料理，重唔算「大單」。

嘅然咁「大鑊」，點解要等到，「地都掃埋」，先至打鑼報料，因何急驚風偏扮慢郎中，延報軍情，因何以至？目的為何？

時聞哥發火，話呢類大時聞，凡同大老勢有關嘅，官家「發炎人」，過往習慣，都會盡力，「冚得就冚」，「冚」唔住嘅，就拖到雨散消雲，先慢慢「稟神」。

更可笑嘅，事過境遷，官家又扮「認真」，話乜野「未能即時反映，「高度關注」，點解成日誓神劈願，「高度關注」，都係「未能及時」，更笑大人嗰口嘅，就係官家又好似好認真咁話，「責成」相關部門，「檢討有關措施」！

相關部門不就是自己嗎？一言蔽之，通報機制，官家主導，但一宗已啟動「大型事故機制」的事件，為何竟會延報，確實耐人尋味。

                                     阿茂