延報 壞了形象

「臭事」延稟，日昨又發生。火燭鬼，道歉聲未落、威龍猛探，走犯跌死人，又延時報稟，點解咁「巧合」，報料都唔「急」。皆因腦袋內，可能有藏「蚯蚓」「臭」都要「冚」。

阿茂昨日唔係造餅，亂咁鬧人，「冤枉」「火燭鬼」，而係佢哋嘅「兄弟」，威龍猛探，班花腰暗查，好學唔學，學埋晒師兄弟啲衰嘢，明明光天白日，走犯跌死人，都遮遮掩掩，做到黑幕重重，延報軍情，延時五個幾鐘，先打攞報料，「好似女仔搽「鑊撈」，自己整衰自己！

其實個出千犯，自己跳窗跌死，係佢自己攞嚟死啫，又唔係「阿蛇」打死佢，錯不在阿蛇。駛乜咁驚青，鬼鬼崇崇，做到阿蛇好似攬罪上身咁款。刻意延報軍情，就會激到人哋鬧，做得咁「戇居」，反而原無罪，似有罪。

點解？蓮花地啲紀律部隊，「發炎」得咁「煎堆」，經常「符碌」，原本並無罪，卻自己攞嚟衰」，無他，腦作怪者也。

皆因蓮花頭，非常愛面子，成日到處晒，話自己好「陽光」。誰不知，認叻就好易，做好就要費心思，但係班「卿家」，又眼高手低，講就天下無敵，做則無能為力。

官場習例，多喜擦鞋，劣短醜事，較少洗擦，臭事密冚，久而久之，「鞋」內之物，成「香港腳」，外表光鮮，內臭難當矣。

                        ‧阿茂‧