同性婚姻保障政府公正無私

美國法院作出判決，裁定「規定婚姻必須為一男一女方可獲聯邦承認」嘅《捍衛婚姻法》（DOMA）違憲，標誌著平權運動向前邁進一步。喺上年底正式開始澳門同志平權運動之前，筆者曾經喺2011年中致函行政法務司司長陳麗敏，鑑於葡萄牙等西歐多國已相繼為同性婚姻立法，詢問澳門幾時將同性婚姻合法化。但陳麗敏指派嘅朱林林以「未有社會共識」為由，迴避立法嘅議題。 爭取同性婚姻或同性民事結合，其中有力嘅理據係：結合係伴侶之間嘅私人關係，不應基於性傾向或性別身份，被剝奪有關權利。而其實同性婚姻，除咗還同性伴侶喺組成家團申請公屋、津貼的計算、醫療卷的轉移、產財分配、退休金的收取權利等方面平等權利外，對保障公眾利益，維持政府公平運作亦相當重要。 喺公共行政行為上，公務員、官員即使有實際共同生活、親密關係嘅同性伴侶，法律上目前未被視為「配偶」，若出現有官員／公務員委任、評審佢嘅同性伴侶或同性伴侶嘅家人嘅情況，都無辦法要求該官員／公務員作出迴避。例如，官員可委任佢同性伴侶（或其親人）做佢顧問，出現咁明顯嘅利益衝突，都完全唔需要迴避。反之，若同性婚姻、同性事實婚或同性民事結合合法化，將更能保障政府運作公正無私，確保公眾利益不受損害。    澳門同志平權運動發起人 周庭希