珍珠植晶片助鑑定 嘟一嘟知產地年份

鑽石鑑定就聽得多，有公司研發全球首創珍珠鑑定技術，培植期間將晶片植入珍珠核。只要用專用嘅讀取機「嘟」一下，就可以知道珍珠嘅產地同年份等背景資料，令買家買得更放心。 Emily早前去咗灣仔一個珠寶展，見到有間叫福井製核所嘅公司，項目主任王俊傑話，現時並無專業珍珠鑑定技術，只能單靠肉眼分辨珍珠好壞，於是有不良商家用化學品漂白珍珠混水摸魚，欺騙消費者。有咗新技術之後，可以將附有獨立編號嘅晶片植入珍珠核，再送去養殖場培養，當珍珠培殖至可出售時，消費者買珠時用專用嘅讀取機嘟一下，每粒珍珠嘅資料都一清二楚，唔使擔心造假，預計兩年後就會有第一批有晶片嘅珍珠推出市場。 王俊傑話，加咗晶片嘅珍珠價錢一定會比無加的貴，佢話消費者當用多少少錢買個信心。至於實際效用有否增強對貨品信心，要等消費者試過先知啦。