一錯再錯‧是蠢還傻

鬼子佬有一句諺語，聰明人不會犯兩次相同之錯誤，愚蠢者則經常為自己製造麻煩。蓮花地之轎衙門，便可能是這句名言之最生動寫照！

皆因近兩日，轎衙門又「捉蟲」，無喇喇大發善心又做咗「好人」，同打鑼轎勾埋手指尾，畀佢地又玩多三季，變相又激到啲父老嬲多幾個月。

條料啱啱報出嚟，「大聲公」個檔口又鬧到爆晒燈。啲父老又鬧轎老爺真係蠢到冇藥醫，今回又係度「捉蟲」，畀打鑼轎又玩多幾個月。

今次落鎚，又係笑料百出，犯駁到唔恨。既然衙門已經自己爆咗出嚟話同佢傾咗成年長，加上佢哋過去嘅「案底」，已經好清楚係長期「犯規」，開檔果陣，已經訂名要打鑼嚟先可以出街，但係佢哋已經好多年「偷雞」，令的蟻民打咗鑼，等到條頸都長晒，夾無轎坐，真係嬲到出煙，早就鬧通街要判佢「極刑」，而轎老爺早一牌，又係威係勢咁款，重咬牙切齒咁嚇打鑼轎，話重出街若再「偷食」，就要「做低」佢咁話，點知到埋門一腳，又咁啱「腳軟」，真係幾難令人信佢唔係「做戲」？

即使講到老爺突發「善心」，以蟻民最大嘅「利益」以「菩蕯心腸」，畀打鑼轎玩多三季，以觀後效，唔通咁多年，都唔知道打鑼轎個「底」咩？如果遲啲佢會化為「聖人」咁規矩，就唔使俾人鬧得咁淒涼啦！

打鑼轎開檔咗咁多年，由係「香閨」應召，搞到通街搵食，明目張膽，反轉張契，據江湖傳聞講，當年「金巴喇」個阿頭，因為想搵多幾個銀仔刮砂，就畀人「搞掂咗」，所以更「有恃無恐」，依家張契快斷時，突然又咁戲劇性發展，唔通又係「歷史重演」，相信當今老爺，唔會犯兩次相似「錯誤」卦？

‧阿茂‧