交通衙門瘀事多

一個「針孔」，篤穿了一潭腐水塘!篤數公今回一「篤」，又露出了蓮花祠堂嘅「敗絮其中」，又令蟻民「豁然開朗」，明白蓮花地嘅交通點解會咁亂籠。

篤數公交出之「例行數薄」，詳列數據，力數交通差做嘢之亂籠﹕「金睛火眼」相機，八成「有眼冇珠」，有啲更成年都「盲咗」，僥倖「到嘢」嘅，又多「像霧又像花」，睇到又好似睇唔到。

交通差當然學過「柔道」將個鑊卸畀「衰到慣」嘅轎衙門。轎老爺又循例「認衰」，又循例高唱「明天會更好」!

篤數公做嘢冇佢地咁「符碌」，再發功篤落去，真憑實據，鬧D差館好似冇掩雞籠，大叠「牛肉乾」冇端端唔見咗，個「妙手神偷」更叻到連啲「快老」都整走埋，真係「盡心盡力」，不留痕蹟，係警衛森嚴既差館，都能咁「神通廣大」，嗰「賊」真係「威」過差大哥!

篤數公篤到「興起」，更篤出唔同環頭嘅「阿蛇」做嘢隨心所欲，花樣百出，重經常「土法上馬」，做嘢好多時都係「阿拉法」，簡直當啲皇榜「冇到」咁話，經常疑似徇私枉法，就順理成章係「家常便飯」嘞。

「阿蛇」係咪咁做，蟻民當然心中有數，不過今次令人耳目一新嘅，就係「黃氣」嘅解釋，話呢啲「瑕疵」，係經過「深思熟慮」嘅疏忽!

不過，「阿蛇」今次又唔係「撐到硬」，對於佢哋十年前訂出嘅「奮鬥目標」，奮鬥到「人都老咗」，重係「尚未成功」，又誓神劈願話「還再努力」!啲蟻民聽到，真唔知好嬲定好笑!

一句講哂，今次篤出嘅醜劇現象，確係好「經典」，真有代表性，因為極力重視化妝嘅蓮花祠堂，華麗外衣掩蓋下，啲衙門咁嘅料，蓮花地嘅交通，搞得好先係新聞!?

‧阿茂‧