安居難求‧民怨四起

蓮花地，起「狂潮」，經屋推「千九」，求屋者「四萬」!呢個現象，彈出問號，蓮花人，恐屋慌!?點解會咁「狂」，孰令「狂」之孰令眾民齊「狂」!

呢個現象，可以上得，世界新聞，蓮花人，唔係好有「銀」，實因被人「滾」!

阿茂百思不得其解，又諗穿咗個頭。終於又諗出咗個「理由」，可能因為蓮花導者出「金口」所致。

又會關佢事?當然有關，且係始作俑者，因多年嚟，尤其係蓮花祠堂開檔之後，祠堂班揸弗人同啲新貴，「攬」埋一齊，仲攬得好實淨，好多時仲難分彼此，睇到啲口痕友成日唱話乜野「官商一體」、「官商勾結」，「利益輸送」咁話。

最得人驚既就係啲蟻民睇住揸弗人，成日將所剩無幾地皮，倒水咁倒畀哂啲貴人，咁啱得咁橋又價錢仲賤過「地底泥」。直情好似「送」出去咁既款。

但係啲地到咗「貴人」手後，又唔係用嚟起樓，只係長年屢月，日晒雨淋，養草育蚊。

另一邊廂，蟻民結婚生仔，幼兒所，老人院，學校擴充，民康場地，卻「無地起樓」，「醒目」炒家幫，乘勢起風浪，哄抬樓價，揚似火箭。

無「殼」蟻民，聲嘶力竭，喚官抑樓價!肥崔「大道理」，話蓮花地，八成父老，擁樓業主，為「父母官」，當保樓民利咁話，對樓價狂漲，更「保駕護航」。

「官心」栽培下，蓮花樓價，升如火箭，特殊權貴，肥過「肥仔水」，一般蟻民，甚而「中產」，望樓輕嘆，豈敢問津?敢奢望者，唯有「公屋」，公屋狂潮，形成「海嘯」，由此而起。

官作孽，民苦受，官諾建屋，可「孚」眾望，豈知「萬九」後，求屋戶仍有，四萬戶伸手，單這一類，已經超過，蓮花地人口，兩成之數多，當日尊者言，澳擁屋之民，已達八成戶，此語可真?還是呃人?看看狂潮，便知偽「真」!

‧阿茂‧