星星之火 可以燎原

星星之火  可以燎原

蓮花尊者呢輪成日開「PARTY」，話聽啲父老「俾料」，重話希望聽咗的「高見」，等佢「開壇」，做好出年「祠堂」啲「法事」咁話。街坊阿嬸話，如果尊者真喺咁有心，唔使係咁高級嘅酒店聽「高見」。就算走出門口，聽聽啲「專業」「英雄」申寃重實惠喇！ 話說唔經唔覺，蓮花尊者坐咗係嗰壇度，又近一載，雖然耐唔中，佢都走出廟堂 ，同各路高人及街坊父老傾吓偈，顯得都幾老友咁。但係好衰唔衰，佢下邊啲老爺就唔及佢咁夠班，耐唔中整啲「符碌」嘢出嚟獻世，一陣又話官財本無得分，無端又話要告人，嚇到班升斗蟻民，手騰腳震。正所謂世上本無事，庸人自醜之，自己攞嚟衰。 啲街坊話，其實係蓮花地，要做好「祠堂」嘅「法事」一字咁淺，搞好民生，掂過碌蔗，因為蓮花地人分三等，上等人已經搵到盆滿砵滿，冇也唔妥，中等人亦多養尊處優，聲氣唔多，最多怨氣者，就係啲下等蟻民。 因為佢地收銀兩唔多，入息「掹掹緊」，係現今遊戲規則框框中，有啲重有可能係「世襲奴隸」，佢哋向上望，見到啲「大肚腩」咁肥，啲大老爺又咁符碌夾「得戚」，你話佢哋唔眼紅夾「火滾」就假，所以呢一班「英雄」怨氣最多，對「和蟹」最有威脅性。加上近幾年，蓮花地差大哥，唔知點解突然間咁鬼勤力，猛送「牛肉干」，幾乎每月、每周，甚至每日「送大禮」。啲「轎王」尤其係啲「鐵騎士」，抓住張「牛肉干 」，望望現實，想守法又唔夠「轎位」，銀兩越搵越少，收嗰「六兩銀」，都唔夠找「牛肉干」數，升斗蟻民，能不怒從心中起？！ 故此，逢過大節，例有巡行「贈慶」，呢啲現像，可能就係北大人所講嘅「深層次問題？！亦係星斗蟻民最關心嘅現實問題。 常言道，民怨宜疏不宜堵，燎原怒火，發於星星，主政事者，宜深察民意，點滴錯漏，防微杜漸，更忌火上加油，「祠堂」，「作法」，更要按「善信」所願，誠心作法，佛即是心，明心見聖，則萬事大吉。否則，口是心非 ，「呃神騙鬼」，則「神憎鬼厭」，必遭天譴！                                阿茂